Home Religion y Espiritualidad Ban participa den Diadomingo di Rama Bibo y den Caminda di Cruz...

Ban participa den Diadomingo di Rama Bibo y den Caminda di Cruz Bibo: 12 y 19 April

60
0
SHARE
- Advertisement -

Comision Parokia Dakota ta invita henter pueblo:

ORANJESTAD (AAN) – E integrantenan di e Comision Caminda di Cruz bibo y Diadomingo di Rama bibo, di Parokia di Dakota, Sergio Solognier, Gina Nuboer y Steven Geerman, a bishita redaccion di DIARIO, ya cu Siman Santo ta acercando, y tur dos actividad aki ta den preparacion.

E aña aki tin e 11 edicion di e dramatizacion di e Caminda di Cruz y e di dos aña di e Diadomingo di Rama. E entrenamento ta den proceso, manera ta e custumber tur aña.

DIADOMINGO DI RAMA:

Diadomingo di Rama ta diadomingo 14 di April y e aña aki tin un actor nobo cu ta protagoniza Jesus, ken ta Julio Peralta.

E Diadomingo di Rama tin dos stage pa prepara pa e introduccion di Siman Santo, y e ta wordo teni pa peticion general y tambe di e Pastor.

E procesion ta tuma lugar atardi 5’or saliendo for di Centro di Bario y Deporte Dakota. Ta pidi tur persona pa bin cu nan mes rama, cu lo wordo bendiciona den e Misa.

RUTA: Pampoenastraat, Mispelstraat y caba na Misa La Birgen di Fatima cu e Santo Sacrificio di Misa. Henter comunidad ta keda invita.

Pa Diadomingo di Rama Steve ta interpreta e personahe di Zaqueo, ya pa dos aña consecutivo. Zaqueo ta e cobrado di belasting cu ta subi den mata pa asina wak Jesus mas lihe. Jesus ta bise pa e baha for di e rama y cu e ta bay come na su cas e mesun atardi ey.

CAMINDA DI CRUZ BIBO:

Dia 19 di April pa 10 or di mainta, saliendo for di Misa La Birgen di Fatima.

RUTA: Mispelstraat, Macubaristraat, Apelsinastraat, Pindastraat, Mispelstraat te na Misa La Birgen di Fatima na unda lo tin e Crucifixion y Resureccion di Jesus. Tur persona ta keda invita pa forma parti di e procesion aki.

Ta pidi pa bin cu nan mes boter di awa y pa bisti algo comodo pa e calor y pa cana.

PERSONAHENAN:

Aña pasa, sr. Sergio Solognier a introduci un personahe nobo cu ta Jose di Arimatea, cual lo wordo mantene.  Pastor Jairo lo sigui interpreta Simon di Sirena, y Fatme Rigaud su personahe di Mama Maria. Maria Magdalena ta den e persona di Joally Lake.

Tambe e aña aki tin soldatnan nobo cu ta participa y ademas tin personanan adicional den e grupo di hendenan muher cu ta topa cu Jesus. Y manera a wordo menciona caba Jesus lo wordo representa pa Julio Peralta, cu ta un actor nobo. Den caminda di Cruz Steve Geerman ta hunga dos rol.

E prome ora Pilato ta laba man, e ta hiba e awa pe, y mas den e stagenan e ta interpreta e yiu di Veronica cu ta laba cara di Jesus. Esaki ta e di diez aña cu Steve ta participa den e Caminda di Cruz. Lilian Albertus ta interpreta e señora cu ta sangra.

Jesus ta sali for di e huma y no na parti ariba di Misa.

MUSICA:

E canticanan lo wordo interpreta pa Eltienne Yarzagaray.  E caminda di Cruz lo wordo acompaña pa Massive Brassband. Sonido lo ta na encargo di Myron Dijkhoff. Truck na unda Jesus ta wordo suta ta cooperacion di un compania di towing service.

GRADICIMENTO:

Gina Nuboer a expresa su palabranan di gradicimento pa tur cooperacion cu e Comision ta ricibi y e acogida di pueblo. “ Danki na Dios cu ta duna nos e forza y talento pa asina nos recorda Jesus na un manera mas real posible.

Danki na tur integrante cu ta forma parti di Diadomingo di Rama Bibo, y Caminda di Cruz Bibo pa nan support di tur aña, na tur persona cu ta colabora di un of otro manera, na Bario di Dakota, na Aruba completo, na mi famia.

Tambe tur esnan cu ta yuda patras di cortina, Pastor Joseph Pelc y tambe Pader Szpila, pa tur e añanan cu el a duna su apoyo, entre nan Centro di Bario Dakota y ATHA, tur medio di comunicacion sin lubida e artistanan di make up Marietta Wanopa y Andrew Curiel”.

Sra. Nuboer a agrega cu tur dos evento lo wordo transmiti direct pa Tele-Aruba.

SEGURIDAD:

Sr. Solognier a duna di conoce cu e parti di seguridad ta wordo percura door di Polis como tambe e vergunning pa ta riba caya, cu ta un exigencia cu mester cumpli cune. Grupo Scout Casibari lo habri e Caminda di Cruz. Lo conta tambe cu colaboracion di Cruz Cora. Palabranan di gratitud pa e instancianan aki tambe.

- Advertisement -

DUNA COMENTARIO

Please enter your comment!
Please enter your name here