Problemanan social na Aruba a bay fo’i man

    1097
    1
    SHARE
    - Advertisement -

    Glenda Hernandez, Directora di DAS:  “Aworaki ta hayando e frutonan”

    ORANJESTAD (AAN):  Glenda Hernandez, Directora di Departamento di Asuntonan Social a duna di conoce cu hopi mama soltero ta confronta stress pasobra nan a haya yiu, nan tin cu wak pa nan yiu y nan tin cu traha tambe.

    E combinacion aki ta haci cu nan ta haya stress y esaki a sali afo for di un investigacion di Helen Guda na 2008. Esaki ta hiba na dalmento, violencia, wak menos pa e yiu y nan tin su sobrebibi tambe.

    Pesey hunto cu Wit Gele Kruis a cuminza un proyecto di sosten pa mamanan soltero den cada distrito. Ta yuda nan, bishita nan pa wak kico nan mester y duna nan guia pa ora un mucha nace.

    El a laga sa cu dentro di poco ta bay cuminza na 6 scol di SKOA y scolnan di DPS pa wak ki problematica e mucha tin ariba tereno social. “Nos no ta bay mete cu e problemanan cognitivo pasobra esey ta tarea di scol. Locual nos si ta bay haci ta traha cu scol pa yuda nan riba tereno social- emocional”, a indica.

    Ta bay bin cu un acercamento unda e hendenan di guia social lo repasa e lista di personanan y di muchanan cu tin problemanan social. Ta bishita nan na cas y ta wak cu cual solucion por bin pa nan, Hernandez a señala.

    DAS ta traha hunto cu Polis, y hopi hende cu ta rond di e problematica.

    El a agrega cu un problematica social hopi biaha na scol ta domina y ta multi-facetico. A laga e cosnan bay foi man y aworaki mester trece bek. Pa trece bek mester minimal 5 pa 6 aña pa cuminza bisa cu por bira e situacion sino ta 10 aña, a remarca.

    Aworaki ta hayando e frutonan ey di e maneho cu a wordo hiba y esey no ta kita di un dia pa otro. “No tin nada mas compleho cu cambia un conducta di un persona cu a bay malo. No ta papiando di drecha un brug. Bo ta busca placa y bo ta drecha e brug. Ta papiando di hende”, e directora di DAS a expresa.

    DAS ta bezig cu e plan di bishita hende den barionan. El a bisa cu hopi biaha hende tin berguenza di admiti cu nan mester di ayudo, cu nan tin un necesidad.

    Hernandez a indica cu e ta hopi optimista cu e ‘approach’. E ta hopi trabao pero nan ta bay p’e.

    Banda di esaki a señala cu pa loke ta mamanan soltero, DAS no ta forma parti di un proposicion pa baha e cantidad di oranan di trabao te na 6 ora pa dia. Esaki ta cay bao di e sector laboral.

    E no ta haya e idea malo pero a duna di conoce cu nan ta trahando cu un grupo di mama soltero cu tin yiu chikito. Na fin di April, minister lo anuncia e candidatonan cu a caba e trayecto aki cu ta subiendo ariba e mercado laboral.

    E porcentahe di mamanan soltero ta aworaki di 60%. E grupo aki a pasa un trayecto di motivacion, preparacion y pa bay over na loke ta e preparacion cu creche. Ta buscando bon creche pa yuda nan subi ariba tereno laboral. Lo bay over na atende tambe cu traimerdia y opvang pa e hobennan despues di scol. “No tin nada mas malo cu un mama cu ta traha y un tata cu traha anto ta pensa ‘unda mi yiu ta?’. Nos mester yuda nan den esey”, Glenda Hernandez a indica.

    - Advertisement -

    1 COMMENT

    1. Welcome to Aruba i asina aki kier pone cherry riba e bolo ora di caba legaliza droga na Aruba. Diep triest!

    DUNA COMENTARIO

    Please enter your comment!
    Please enter your name here