Tocante seguridad na scol:
ORANJESTAD (AAN) – Minister Presidente mr. Evelyn Wever-Croes a elabora tambe, den conferencia di prensa, tocante e accion di docentenan relaciona cu e preocupacion cu nan tin, tocante seguridad na scolnan.
E dignatario a enfatiza cu esaki ta un preocupacion cu e ta comparti cu e docentenan. Na momento cu a surgi un incidente, siman pasa, cu a conduci cu maestronan a entrega un manifiesto na Minister di Enseñanza, el a bay haci un inventarizacion, saliendo for di punto di bista cu pa basta tempo tin un protocol cu ta atende cu e tema aki, y e tin entendi cu ta wordo papia di dje caba, pero tin nada concreto.
E mandatario a menciona cu el a haci un peticion tanto na Minister di Enseñanza como e Minister di Husticia pa hunto finaliza e protocol aki, pasobra hopi trabao a wordo realiza caba pa yega na locual tin aworaki riba mesa, pero e no a wordo finaliza.
E mandatario ta desea cu e protocol aki wordo finaliza mas pronto posible, pa asina hunto cu e docente y maestronan pa yega na protocolnan cu ta aplicable pa Aruba.
Nan a reuni caba cu minister y tambe nan a reuni cu Parlamento, nan tin reunion cu e dignatarionan di enseñanza y husticia, pa nan atende e tema aki hunto e Diabierna aki mes.
Minister Presidente mes ta den contacto cu SIMAR pa wak kico e por haci di su banda, pa por yega lihe na e protocol, pasobra seguridad na scolnan no ta solamente un mayor cu a lanta man na un maestra.
“Esey ta algo totalmente inaceptable, intolerable y e ta ilegal. E ta contra ley! Pero ta bay mas leu cu esey tambe. Nos mester bay weita kico ta conduci pa e situacion yega asina. Kico ta e circumstancianan bao di cual esaki a sosode. Di con nos tin un situacion cu a sali foi man asina aki. Pero tambe tin di haber cu seguridad di mucha, di docente cu docente riba tereno di scol. E tin di haber cu seguridad di otronan rond di scol cu tin nada di haber cu maestronan y muchanan di scol”, Minister Presidente a remarca.
Prome Minister a referi na un plan un poco mas extenso, den cual lo envolve minister di Asunto Social tambe, pasobra den e Crisis Plan Social tin e aspecto aki di e cultura di tolerancia y no violencia, pues gobierno ta purba di hacie un tema integral.
E mandatario a reitera, finalmente, cu e pa e ministernan concerni caba cu e protocol aki, cu tur e papeleo, pa tur e trabao haci den pasado no bay perdi!
