ORANJESTAD (AAN)- Actualmente hopi di e damnan ta Aruba ta basta seco y asina mes por mira trucknan di construccion ta haci uzo di e damnan aki pa nan trabaonan, sin corda cu e awa aki ta destina pa agricultura y cria.
Señora Nathaly Maduro di Santa Rosa a bisa cu nan ta haya hopi yamada cu trucknan di construccion ta buscando awa pa basha riba caminda. Nan ta haya lamentable di esaki pa motibo cu awa no ta yobiendo y Santa Rosa ta depende eigenlijk 100 porciento riba awanan di dam pa entrega cu cunukero.
Actualmente nan sa haya cooperacion di WEB Aruba NV ora nan bay haci spoeling di cierto di nan tubonan pero esey no ta constant, pero pa sigura cu e fauna no ta keda sin awa Santa Rosa mes a stop di coy awa na cierto damnan.
A splica cu lo bay saca un lista den DIARIO pa mustra cual ta e damnan pa no haci uzo mas di dje y cua ta e damnan cu ainda Santa Rosa ta uza y ta pidi pa e companianan di construccion no busca awa na nan. E dam di Moko ta sali enberdad cu quizas esey por bira un opcion pa nan, pero locual ta e damnan principal, entre otro esun di Rooi Afo caminda tin ora bo ta pasa bo ta wak e trucknan aki ta busca awa, ta hopi lastima.
Na momento cu e damnan aki seca, no tin aceso na e awa recycla di RBZI y si awa no yobe e lo bay bira un problema grandi pa hopi cunukero. Y por mira cu awendia e desaroyonan ta sigui crece, tin hopi mas hende ta plantando y Santa Rosa hopi biaha aunke awa no ta yobe, pero ta pidi e cunukeronan pa nan tin nan structuranan cla, cu si e yobe nanpor colecta awa.
Di otro banda hopi casnan tin airco, hopi companianan tin airco y Santa Rosa ta recomenda tambe pa haci uzo di e awa ey. Si por tin companianan cu di un of otro manera ta catch nan awa di airco y no ta haci uzo di dje, pa laga Santa Rosa sa, y gustosamente lo wak si por busca e awa cu nan trucknan pa asina nan por sigui duna e servicio pa hiba awa pa e cunukeronan.
A yega di cera algun dam, entre otro esun na Hooiberg, a pone cadena y hasta piedra, a hacie conhuntamente cu Polis e tempo ey pa motibo cu hopi auto horta tabata worde haya den e dam, pero no tin eigenlijk un ley cu ta permiti pa bo cera e damnan. Damnan eigenlijk ta pa uzo publico, pero destina pa agricultura y cria.
Mirando cu e awa di plantanan di recicla ainda no ta apto ainda pa worde entrega na cunukeronan, pa trucknan di construccion haci uzo di e awa aki. Pasobra casi no tin damnan pariba y mesun diesel cu nan kier spaar, Santa Rosa tambe kier spaar.
Pa yuda e cunukeronan a pone trucknan extra riba Diasabra y tambe tin e pos na Pavia cu tambe ta habri back na e molina y tambe tin e molina na Savaneta. Santa Rosa ta bezig ta drechando e molina na un otro pos cu tin na Noord y nan ta bezig ta mirando unda pa re-aloca molinanan cu a pone den pasado y cu no tin awa mas den e posnan, pa pone nan otro caminda pa asina tog sigui yuda e cunukeronan.
Di otro banda tambe ta cu e posnan aki no ta pa hendenan cu ta laba auto y no ta pa hendenan cu ta den construccion. E posnan a worde drecha y e molinanan a worde poni pa e uzo di agricultura y cria.
