Na MFA Paradera
ORANJESTAD (AAN): Diaranzon, 29 Mei 2019, lo bay tin un charla na MFA Paradera tocante e malesa Multiple Scleroses y e ultimo desaroyonan den e area aki. E charla lo wordo duna pa neurologo dr. Roberto Weiser. Pashentnan di MS y publico general ta cordialmente invita pa acudi na MFA Paradera Diaranzon, 29 mei 2019, entrante 6.30 PM. E charla di Dr. Weiser mes lo cuminsa 7.00 PM y e anochi lo termina rond di 8.30 PM.
Dia Internacional di MS ta tuma lugar tur aña riba 30 di Mei y ta ser coordina pa e federacion internacional di multiple scleroses. Meta di Dia Internacional di MS ta pa concientisa publico general tocante e malesa MS via campañanan di informacion. Mirando cu e aña aki 30 di Mei ta cay riba Dia di Asuncion, a dicidi di tene e anochi di informacion diarason 29 Mei.
Un di dos meta di e anochi di informacion ta pa sondea bou pashentnan di MS e necesidad pa lanta un organisacion y/o un grupo di sosten y inventarisa e deseo y/o necesidadnan cu ta existi bou di e pashentnan di MS.
E anochi di informacion ta dirigi no solamente riba e pashent di MS pero tambe riba su pareha, famia, amistad y ayudantenan cu ta sostene o brinda e pashent asistencia tur dia.
Organisadornan di e anochi di informacion ta invita personanan cu ta interesa pa bira boluntario y/o miembro di un directiva pa acudi na e anochi di informacion pa haya informacion y participa bo interes.
E organisadornan di e anochi di informacion ta gradeci Dr. Weiser di antemano pa su cooperacion y ta spera di por conta riba bo presencia Diaranzon, 29 Mei 2019, na MFA Paradera.
