Home Actividad Especial Awe Diahuebs tin prome edicion di “Meet San Nicolas”

Awe Diahuebs tin prome edicion di “Meet San Nicolas”

136
0
SHARE
- Advertisement -

ORANJESTAD (AAN): San Nicolas ta un pueblo unda ciudadanonan di diferente nacionalidad a sa di establece nan mes y forma nan hogar. E ta un lugar unda cultura ta bibo y ora bo ta cana den su cayanan bo por sinti e calor y amabilidad di su hendenan den tur aspecto.

Pa basta tempo caba e habitantenan di San Nicolas a bin ta pidi pa bin back cu un actividad den cayanan di San Nicolas unda nan por bay y distrai nan mes, pero na mes momento por atrae turistanan pa bin y experiencia kico San Nicolas tin di ofrece.

Un grupo di ciudadanonan preocupa a dicidi di uni pa asina traha un plan con lo por yega na un manera sostenibel back na pone un actividad asina den cayanan di San Nicolas.

Di eynan a nace e proyecto di “Meet San Nicolas”, un proyecto unda un grupo di voluntario cu sosten di comerciantenan mayoria di pariba di brug ta bini hunto pa asina duna nos bishitantenan y e pueblo un actividad pa bin hunto y experencia lo mihor cu San Nicolas tin pa ofrece.

E evento aki financia unicamente door di e mesun bendedornan cu lo ta ofrecendo nan productonan durante di e evento, pues mas stand bin mas grandi e evento aki lo por bira.

DIARIO a compronde cu e prome edicion di Meet San Nicolas lo tuma lugar awe Diahuebs cuminsando pa 6:30’or di atardi te cu 10’or di anochi den e Promenade di San Nicolas.

Durante di e anochi aki lo bay tin diferente stand di cuminda local y Caribense, bebidanan fresco y hopi productonan localmente produci door di artesanonan local. Mas cu claro lo no por falta bon musica ambiente y hasta mesanan di domino pa asina esnan cu ta desea por bin relaha y kita un tiki stress por bin unwind nan mes.

E invitacion ta pa henter e pueblo di Aruba pero en especial e hendenan di San Nicolas cu tanto a pidi pa un actividad bin hunto y sostene nos comerciantenan cu ta duna di nan parti pa asina e proyecto aki por a mira luz di dia durante e prome edicion di “Meet San Nicolas” cu su entrada ta completamente gratis.

- Advertisement -

DUNA COMENTARIO

Please enter your comment!
Please enter your name here