Postura di Presidente Trump tin relacion directo
*Aruba ta keda parti di investigacionnan contra Maduro
*Empresanan grupo Maduro a haya privilegio na Aruba
ORANJESTAD (AAN) — E mensahe cu Minister Presidente mr. Evelyna Wever-Croes a presenta na Parlamento di Aruba riba e posibilidad pa Citgo realisa e proyecto na Aruba, ta verifica informacionnan cu grupo Maduro a uza Aruba pa pa comete crimen contra Venezuela. Aruba ta keda parti di investigacionnan di parti di e gerencia nobo instala dor di Presidente Juan Guaidó, cu a base di e investigacionnan por determina pasonan cu e compania estatal di Venezuela por tuma.
Informacionnan cu DIARIO a ricibi despues di e declaracionnan oficial di Minister Presidente Wever-Croes ta mustra cu un di e prioridadnan di Citgo ta pa establece a grado cu Venezuela a wordo perhudica dor cu grupo Maduro a uza placa di e pais pa metanan cu no tabata na fabor di Citgo ni Venezuela.
Asamblea Nacional di Venezuela a produci un rapport oficial riba e abuso cu Chavismo tabata haci di placa di Citgo, cu ta parti segun informacionnan di e capital enorme di Venezuela cu a wordo laba dor di Grupo Maduro.
Informantenan di DIARIO a bolbe referi na tantisimo caso rond mundo contra miembronan di e grupo Maduro cu a debilita e posicion di Citgo cu ta carga di debe ademas di e hecho cu e compania ta borg pa Rusia y pa cantidad di compania Mericano.
E hecho cu Presidente Trump a nenga di duna asistencia na Grupo Guaidó pa haya yega na acuerdonan cu comerciantenan Mericano cu ta exigi pago di nan debe na PDVSA y Citgo, tin relacion directo cu e hecho cu Merca mester ta sigur cu e no ta mara su mes na compromisonan prome cu ta sigur cu Maduro a bandona poder.
No por permiti ningun riesgo ora ta atende cu Citgo den e situacion actual den cual exponentenan importante di Maduro ta wordo persigui riba tereno internacional pa labamento di placa di Venezuela y abuso di fondonan cu a pasa via Citgo tambe.
Segun informantenan e declaracionnan di Minister Presidente Wever-Croes a duna forsa oficial na e informacionnan cu tabata tin exponentenan di Maduro cu a haya trato special den e proyecto na Aruba.
Ta referi aki na e contratistanan Venezolano amigo di grupo Maduro cu tambe lo ta parti di e investigacionnan na Citgo.
DIARIO ta sigui informa Aruba den su proximo edicionnan.
