Home Noticia Internacional “Den futuro cercano nos poblacion lo conoce mas fayecimento cu nacemento”

“Den futuro cercano nos poblacion lo conoce mas fayecimento cu nacemento”

701
0
SHARE
- Advertisement -

Director d SVb durante simposio riba migracion na Corsow:

ORANJESTAD (AAN) — Siman pasa “Conseho Social Economico di Corsow, Sint Maarten y Aruba”, a organiza un simposio na e isla di Corsow, caminda a trata e fenomeno di migracion. Un di e oradornan di parti di Aruba tabata director di Banco di Seguro Social di Aruba, ir. Edwin Jacobs.

Matutino DIARIO a acerca sr. Jacobs pa ricibi mas informacion riba su participacion na dicho simposio.

Aki ta sigui e entrevista integral cu sr. Jacobs.

DIARIO: Sr. Jacobs, nos a tuma nota di su participacion na e simposio na Corsow. E ta un poco straño cu director di SVb ta participa riba e tema di migracion. Sr. Jacobs por a informa di con esaki?

Sr. Jacobs: “Enberdad cu na prome bista e ta algo straño, ya cu na SVb nos ta dedica nos mes na seguridad social. Y ta hustamente den e cuadro di seguridad social mes, nos tin un link na migracion. Na SVb, desde un tempo nos a amplia nos vision riba seguridad social. Nos a desaroya un modelo den cual nos a identifica y ta monitorea tur e variablenan y desaroyonan den nos comunidad cu ta afecta e sostenibilidad financiero di e programanan di seguridad social cu SVb ta maneha, pero tambe di nos sistema di seguridad social den su totalidad. Y ta den e proceso di monitoreo aki cu nos ta yega na e tema di migracion”.

DIARIO: Kico tabata e nucleo di sr. Jacobs su presentacion?

Sr. Jacobs: “Mi presentacion basicamente a concentra rond di nos sistema di seguridad social. A base di nos sistema di monitoreo, nos a mustra ki impacto e proceso di envehecimento y di malesanan cronico tin riba e gastonan di nos sistema di seguridad social. Nos monitoreo ta calcula cu e dos desaroyonan aki lo resulta den un crecemento promedio di 1.9% tur aña di nos sistema di seguridad social. Esaki ta conta pa e periodo di 2015 pa 2035 y ta un crecemento real, pues excluyendo inflacion. E crecemento aki ta uno grandi y nos mester cuminza pensa con ta financia esaki”.

DIARIO: Y e financiamento ta factible?

Sr. Jacobs: “E no ta facil pa conclui cu si. Nos sistema di seguridad social ta ricibi su entrada mediante prima, belasting directo y contribucion di gobierno. Na final, tur tres fuente di entrada ta depende di e crecemento economico. Y nos economia ta bay enfrenta retonan e siguiente añanan nos dilanti.

E proceso di envehecimento na Aruba a yega un nivel caminda e cantidad promedio di yiu pa hende muher den nos poblacion ta bao e cantidad minimo necesario pa reemplazo. Aworaki pa cada hende muher den nos poblacion, e cantidad di yiu ta den promedio 1.7 pa 1.8. E cantidad minimo pa reemplazo ta na 2.1 yiu. Kico esaki ta nifica? E ta nifica cu den menos di 10 aña, e cantidad di personanan cu ta fayece lo ta mas halto cu esnan cu ta nace. Pues, nos poblacion lo bay bira chikito. Nos poblacion no tin e potencial pa reemplaza su mes”.

DIARIO: Pues, sr. Jacobs, e lo tin impacto tambe riba nos economia?

Sr. Jacobs: “Sin duda. Ta yega e momento cu nos poblacion mes no por reemplaza e cantidad di personanan cu ta sali di e mercado laboral, corda pa crece nos economia. Si no trece persona di pafor di Aruba, nos produccion lo baha y lo nifica menos entrada tambe pa nos sistema di seguridad social”.

Red: Eynan e ora ey, e link cu migracion?

Sr. Jacobs: “Corectamente. Ora nos studia si economia di Aruba lo por produci e entrada cu tin mester pa cubri e gastonan den futuro di nos sistema di seguridad social, nos ta yega na e punto di migracion. Sin migracion, nos economia no lo por sigui crece. Y sin crecemento di nos economia, nos no por haya e extra entrada cu nos sistema di seguridad social mester. Y sin e extra entrada ey, nos lo mester reduci nos pakete cu nos sistema di seguridad social ta ofrece. Pues, nos lo mester corta den nos bienestar. Y mi no ta convenci cu nos ta desea di entrega loke nos a lucha pe hopi aña”, Ir. Jacobs a conclui.

Den otro articulo, DIARIO lo profundisa mas riba e materia interesante aki.

- Advertisement -

DUNA COMENTARIO

Please enter your comment!
Please enter your name here