ORANJESTAD (AAN): Recientemente Aruba a worde poni riba lista preto di EU debi cu algun cambio den nos leynan no a keda efectua promer cu 1 di januari 2019. E cambionan necesario a keda pasa na april den Parlamento di Aruba y cu esaki awor Aruba ta cla pa worde baha fo’i e lista preto di Union Europeo.
Union Europeo siguiendo e pasonan di e Organizacion pa Cooperacion y Desaroyo Economico OECD a haci un investigacion na aña 2015 riba regimen fiscal cu por ta causa daño y competencia inhusto entre paisnan miembro di e organizacion.
Den e investigacion aki a sali na cla cu 3 regimen na Aruba ta worde considera como competencia inhusto y no ta cuadra cu e reglanan di OECD. Ta trata aki di e San Nicolas Regime, e patentbox di e IPC regime nobo y e Vehiculo Transparente. Gobierno di Aruba a worde acerca pa EU pa por haci e cambionan necesario, ya cu si no cumpli cu e reglanan nos Pais lo bay riba e lista preto di Paisnan cu ta permiti pa negoshi paga hopi menos of keda sin paga impuesto.
Gobierno a logra elimina e patentbox di e IPC regime nobo entrante 18 di oktober 2017 y a eboli e San Nicolas Regime na oktober 2018 conforme acuerdo cu EU, pero no a logra keda na cla na ora cu e cambionan na e Vehiculo Transparente promer cu e deadline di 1 di januari 2019. Pa e motibo aki, na maart EU a dicidi di pone Aruba riba nan lista preto di Paisnan cu no ta coopera cu un sistema fiscal husto.
Dia 4 di april 2019 e cambionan necesario den e leynan ‘Algemene Landsverordening Belastingen’ y e ‘Landsverordening winstbelasting’ a keda aproba pa Parlamento y dia 10 di april e ‘Landsbesluit aanwijzing reële economische aanwezigheid transparante vennootschap’ tambe a keda decreta. Cu e cambio di e leynan aki y e decreto, Aruba a cumpli cu e cambionan necesario y a manda esaki mesora pa EU pa por cuminsa e ‘delisting process’ pa por worde baha fo’i e lista preto.
For di EU a recibi notificacion cu e Ley y e Decreto ta ‘EU compliant’ y pesey dia 17 di mei proximo durante e reunion di Ministers di Finanzas di EU, Aruba por worde baha fo’i e lista preto y por figura atrobe entre e Paisnan cu tin un sistema fiscal cu no ta fomenta un concurencia cu ta inhusto.
