Home Editorial E palabra famia ta describi un relacion unico

E palabra famia ta describi un relacion unico

29
0
SHARE
- Advertisement -

Pa describi lasonan unico cu nos tin cu otro persona of grupo di persona, nos ta uza e palabra “famia”. Leynan di nos pais, ta basa riba defensa di e instituto famia. Den mundo medico e importancia di herencia familiar den asuntonan di salud, ta wordo confirma continuamente.

E palabra “famia” ta mustra riba e importancia di e nucleo di comunidad, den cual hende ta nace y desaroya segun e pakete di normanan y balornan nacional, cu ta duna cada pais su caracter special.

Den nos mundo actual, problemanan grandi ta surgi hustamente pa motibo cu e forma cu hende ta atende cu otro a bay atras. E problemanan mas grandi cu nos mundo ta confronta ta, cu no tin respet mas pa famia, calidad di famia y e identidad mara na un famia, cu ta bira identidad di un comunidad y di un pais.

E nivel di comportacion, di cultura, idioma cu ta encera e nivel cu nos ta comunica cu otro, respet pa nos mes y pa otronan, ta parti di e crisis moral cu ta fomenta actonan horibel riba tereno di criminalidad.

Un recien naci ta yora pasobra e ta wordo introduci na un mundo desconoci. E situacion den cual e ta nace, for di prome momento ta defini su pasonan den bida. E lo depende di brasanan di su mama pa haya algo di refugio despues di a bandona e proteccion total di su mama.

E mester adapta na luz, na temperatura, na e caranan cu e ta mira, e zonidonan cu su horea ta capta, e biento cu ta supla. E ta experencia hamber, desorientacion y su famia mester duna direccion.

E famia por ta pober of rico. E recien naci no ta interesa den e placa cu tin na banco,  e luho di e cama. E ta interesa si tin un mama presente pa brinda prome asistencia ora e haya su mes confronta cu loke e no por reconoce.

E sosten di famia for di prome momento di bida di un ser humano ta parti di un circulo cu nos ta yama bida y cu ta termina ora ancianonan cu no por percura mas pa nan mes, ta ricibi amor humano pa nan por cera nan ciclo di bida.

Cada comunidad, cada nacion, tin su forma pa atende cu hende di momento cu e nace te ora e despedi. Cultura ta describi e forma cu hende ta biba cu otro y ta determina nivel di bida.

Na Aruba tradicionnan familiar tabata evita problemanan cu awe nos ta confronta. E famia tabata un instituto di respet cu tabata wordo planea. Prome cu dicidi pa un famia nobo, e ingredientenan cu mester a conduci na un relacion duradero tabata wordo midi.

Famia y amigonan tabata yuda otro construi cas. E famia tabata tin entrada. E tata y e mama tabata tin bista y atencion pa bienestar di nan famia na prome luga. Tabata tin problema, pero tabata tin yudansa di un pa otro pa soluciona problema y tabata tin regla cu awe a bay perdi.
Na trabou nos tabata un famia. Empresanan Arubano tabata resulta den famia. Aruba tabata un famia, proteha pa leynan cu tabata exigi respet pa nos balornan y moral.

E existencia di DIARIO tin un conexion directo cu e sentido di famia. Pa nos por comunica cu otro, a base y pa defensa di nos cultura, nos idioma, nos decisionnan pa futuro, DIARIO a nace na momento cu e anhelo nacional pa nos bira pais a culmina.

Awe nos mester sali na defensa di e sentido di famia di Aruba, cu ta e forsa mas grandi cu nos a ricibi di nos Creador, pa nos por ta feliz.

Nos ta famia y como famia nos mester defende bienestar di Aruba cu ta depende di nos.

Arubianismo ta describi e relacion unico cu semper a uni nos pueblo den su lucha pa realisa e soñonan di mas grandi.

- Advertisement -

DUNA COMENTARIO

Please enter your comment!
Please enter your name here