Home Editorial E peticion pa oracion di nos Minister Presidente

E peticion pa oracion di nos Minister Presidente

91
0
SHARE
- Advertisement -

Un acto sumamente bunita a wordo registra fin di siman pasa, na momento cu Minister Presidente di Aruba, mr. Evelyna Wever-Croes, a haci un peticion na e pueblo di Aruba pa resa.

E palabranan di e gobernante tabata tin impacto grandi riba e pueblo di Aruba, cu sin distincion di partido politico, ta biba cu e realidad di peligernan enorme cu nunca Aruba a spera cu lo a rondona e pais.

Minister Presidente a expresa e palabranan cu semper a bini dilanti den e forma cu Aruba ta atende cu situacionnan dificil y peligroso pa Aruba y e comunidad Arubano.  Aruba, den dificultadnan grandi, ta baha cabes y ta pidi asistencia divino pa sobrevivencia den e circunstancianan.

E gobernante a demostra cu e tambe ta sinti e angustia cu ta yena e ciudadanonan di Aruba, cu ya no solamente mester lucha cu un crisis financiero y economico hamas bisto, pero mester enfrenta un situacion di confrontacion cu tin tur caracter di un guera den desaroyo dilanti porta di e pais.

Minister Presidente Wever-Croes a duna prueba cu e ta parti di e pueblo cu e mester dirigi den un lama di tratadonan internacional, crisis internacional y hostil pero den cual na prome e mester duna curashi na e comunidad pa sigui dilanti.

E solucion y desaroyo di e problemanan actual pa un gran parti no ta den man di Aruba, cu ta depende di loke lo pasa na Venezuela pa trankilidad bolbe. Ta den un situacion grave, e pais mester tuma decisionnan tambe cu ta dicidi riba entrada di trahadonan y tur aspecto diario di un nacion.

Minister Presidente Wever-Croes a duna muestra di su identidad Arubano, cu na momentonan cu limitacionnan humano ta presenta, ta uza oracion pa kibra tur barera, tur peligro tur obstruccion cu ta stroba determinacion pa alcansa un proposito.

E lider nacional a gara na e fe di Aruba, cu semper a busca e fe di oracion, pa confronta tur loke por presenta.

Awe DIARIO ta sostene e peticion y ta pidi Aruba pa ban sigui den oracion. Pa pidi bendicion di nos bon Dios pa saca Aruba for di peliger y problema y habri caminda y fronteranan nobo pa e pais.

Laga nos fe uni nos den e forsa di oracion pa saca nos pais dilanti y hiba Aruba atrobe na pas y trankilidad pa nos por entrega e generacionnan nobo un pais cu un futuro sigura pa cual nos ta lucha y pa cual nos ta sigui confia den e bendicion divino cu semper tabata nos animo y exito.

Aruba lo bolbe demostra cu e ta un pais bendiciona.

- Advertisement -
SHARE
Previous articleIliene Tromp
Next articleHernandez Heide

DUNA COMENTARIO

Please enter your comment!
Please enter your name here