Hubert Dirksz di FTA:
ORANJESTAD (AAN): Presidente di Sindicato FTA, Hubert Dirksz, ta kere cu e criterianan pa aumenta salario minimo mester wordo revisa. “No ta asina cu salario minimo mester wordo dicidi solamente ariba inflacion. Nan ta kere cu inflacion no ta wordo causa solamente pa aumento di salario.
A bisa cu inflacion ta wordo causa pa tambe pa otro gastonan cu ta haci e “cost of doing business’ halto. E por bin door di mas belasting, transporte y di otro asuntonan di mal maneho di e compania.
Dirksz ta bisa cu por ehempel. hopi compania no ta inverti manera mester ta den nan negoshi, pa mantene e infrastructura corecto y ta yega e momento cu tin gastonan extra cu ta haci dificil pa e negoshi draai.
Ta di compronde cu tin negoshinan chikito cu nan margen di ganashi ta abao cu un gasto halto, akinan logicamente aumento di salario minimo pa ciertonan negoshinan lo tin impacto.
Na unda tin contratonan colectivo, a indica, por bisa cu no ta existi salario minimo. Eynan, FTA no ta kere cu aumento di salario minimo mester tin un problema aworaki.
Loke si nan ta kere ta cu e manera di hacie mester ta mas formal y cu no ta bin reaccion manera cu a bin for di gremio comercial. “Sinembargo, nos sa cu gremio comercial a participa den e conseho social economico y a discuti e punto aki. Kiermen e no mester ta algo straño”, a bisa.
Banda di esaki a expresa cu loke mester ta straño ta nos ta custumbra di haya un cambio di salario minimo meymey di aña. Mas tanto e ta sosode na Januari. Esey ta un punto cu mester wak.
FTA no tin problema cu aumento di salario minimo pero mester wak si e criterianan cu ta wordo aplica.
Dirksz ta kere cu aworaki cu tin dialogo social esaki mester bira un punto di prioridad pa wordo atendi.
