Home Evenemento Fundacion Lanta Papiamento lo reconoce algun scol durante e Feria di Papiamento

Fundacion Lanta Papiamento lo reconoce algun scol durante e Feria di Papiamento

25
0
SHARE
- Advertisement -

Pa nan aporte den enseñanza na Papiamento:

ORANJESTAD (AAN) – Evelyn Ruiz-Croes, Secretaria di Fundacion Lanta Papiamento, y miembro di e directiva nobo, a hiba palabra den conferencia di prensa, relaciona cu e Feria di Papiamento cu lo tuma lugar Diadomingo awo, den Centro di Bario Playa Pabao.

E aña aki Fundacion Lanta Papiamento lo duna un reconocimento na algun scol. E motibo ta cu un di e metanan di FLP ta promove Papiamento den Enseñanza.

Den e cuadro di e proceso di introduccion di Papiamento como Idioma di instruccion na scol, e aña aki e fundacion kier duna su muestra di aprecio na algun scol c u a traha duro y pone nan mes disponible y cu hopi amor a duna di nan parti pa sostene e proceso importante aki.

Nan ta scolnan cu a habri nan porta pa e proyecto piloto “Scol Multilingual”. Den e proyecto aki e muchanan ta siña pa medio di Papiamento, como idioma di instruccion.

Sra. Ruiz-Croes a subraya cu contrario na loke hopi hende ta pensa cu Papiamento so ta drenta scol, Papiamento ta bira e idioma importante pa siñamento, pero banda di dje pa 4 aña caba e muchanan ta cuminza familiariza cu Hulandes, Ingles y Spaño na manera di wega, y ora nan bay prome klas di scol primario nan ta siña lesa y skirbi na Papiamento prome, comprendiendo exactamente kico nan ta haci y kico nan ta lesa y den un fase despues nan lo bay haci esey tambe na Hulandes, despues Ingles y asina ta sigui. Pesey nan ta papia di un scol multilingual pasobra tin diferente idioma hinca aden. Fundacion Lanta Papiamento kier duna danki na e scolnan aki debi na e exito di e proyecto.

E scolnan aki ta Trupial Kleuterschool, y Scol Preparatorio Colegio Conrado Coronel, cu ta e dos scolnan cu a start cu e programa. Di Scol Basico tin Colegio San Hose na Santa Cruz y e parti basico di Colegio Conrado Coronel.

Banda di esakinan ta gradici un scol secundario cu ta Colegio San Antonio, pa e manera con nan a acepta e alumnonan nobo cu a pasa den full e proceso y na un manera hopi positivo ta dunando nan parti di sosten na e proyecto aki.

Otro scol cu e fundacion kier mustra su gratitud y aprecio, ta Emmaschool, cu 40 aña pasa (aña 1979) a dicidi cu nan ta bay duna les na Papiamento, pa nan muchanan compronde kico nan ta siña, y door di esey nan a haci cu Aruba a cuminza traha materialnan y produci buki na Papiamento.

Nan ta bay duna nan danki den forma di un certificado y ta spera nan Diadomingo awor durante e feria, pa bin acepta esaki.

- Advertisement -

DUNA COMENTARIO

Please enter your comment!
Please enter your name here