ORANJESTAD (AAN): Tabata siman pasa den oranan di anochi, cu Guardacosta di Aruba a haya informacion di Central di Polis di Aruba. Nan a bin haya sa cu e momento ey tin un boto ta drief pazuid di Aruba, y ta sigui bay pabao. E boto a confronta dificultad cu e motor, y pesey a perde tur forza.
E prome yamada mes a drenta via Aruba Ports Authority cu a capta e mensahe di emergencia di e boto “Moana”, cu e momento ey tabata drief bayendo mas leu for di punto Manchebo.
A ser informa, cu e boto aki tin 4 persona abordo, y un di e personanan aki ta un Polis na civil.
Guardacosta e momento ey a dicidi pa saca un boto tipo Metal Shark pa bay yuda esnan den e boto.
Mientras tanto, Aruba Ports Authority a pidi un tankero cu tabata den e area, pa purba duna asistencia na e boto aki.
Moana asina pues a keda drief banda di e tankero, te ora cu e Metal Shark a yega. Ora cu a mira cu tur hende abordo ta bon di salud, a tira un cabuya pa e boto aki, pa asina lastra esaki bek rumbo pa Aruba.
Te Diabierna madruga, e boto a yega bek na Waf di Playa, unda esnan abordo por a subi tera sano y salvo.
