Minister Evelyn Wever-Croes por a actua na forma rapido
*Tratado pa frontera Venezuela/Reino ta den man di Hulanda
*Vice Ministernan Maduro tampoco tin autoridad pa actua ainda
ORANJESTAD(AAN)–Na e momento cu e frontera entre Aruba y Venezuela a wordo habri, DIARIO a mustra cu algo sumamente serio tabata pasa na momento cu e tension ta aumenta den region di Aruba. Nicolas Maduro no tabata tin ningun poder pa dicidi cu ta cera ni habri frontera pasobra e no wordo reconoci mas dor di Reino, incluso Aruba como Presidente di e pais.
Minister Evelyn Wever-Croes durante fin di siman a actua mientras Aruba ta un zona di halto riesgo a base di loke ta pasa na Venezuela.
Investigacionnan di DIARIO a mustra cu ta resalta cu Nicolas Maduro mes no a duna e orden pero a laga esaki na e Vice Minister Presidente, cu tampoco tin derecho di papia ya cu e ta parti di e grupo di Nicolas Maduro y no ta cay bou di e areglo di “diplomatico” cu cual Reino Hulandes a mantene relacion den e situacion cu a surgi.
Na segundo luga e hecho cu Nicolas Maduro a parti e teritorio Hulandes den tres parti, ta referi directamente na e areglo pa e Zona Maritimo di cada pais den Reino Hulandes.
Tin diferente areglo di “frontera” den e relacion di paisnan den Reino. Reino Hulandes na 1978 a cera un acuerdo di frontera cu Venezuela, cu ta describi e teritorio maritimo y aereo entre Hulanda y Venezuela.
Banda di esaki na 1985 a yega na un areglo pa e fronteranan maritimo entre Antia Hulandes y Aruba den cuadro di e Status Aparte di Aruba. Despues a delinea e teritorio entre e pais Curaçao y Bonaire, cu a bira parti di Hulanda.
Esaki ta loke awor a wordo uza dor di Nicolas Maduro pa stipula cu e frontera maritimo entre Venezuela y Aruba ta wordo habri.
Sinembargo e tratado entre Reino y Venezuela pa loke ta trata fronteranan di teritorionan nacional ta den man di Reino cu tin pues e tratado di frontera cu Venezuela.
DIARIO lo sigui amplia riba tur desaroyo relaciona cu e topico aki, cu ta demostra e peliger di Nicolas Maduro pa e islanan.
