Barco Mericano y mas sancion contra petroleo pa Cuba
ORANJESTAD(AAN)–Un situacion sumamente critico ta describi entrada di e region rond di Venezuela den fin di siman.
Mientras Juan Guaidó a convoca manifestacionnan pa Diasabra, mencion a wordo haci den medionan di comunicacion di un barco Mericano den lama den vecindario di Venezuela. Lo ta trata di e barco CG James di Guarda Costa Mericano cu lo tabata den e zona exclusivo pariba di e pais.
Ayera Merca a impone mas sancion contra companianan cu ta entrega petroleo na Cuba mientras tambe Merca a acusa Maduro di ta silencia Asamblea Nacional dor di persecucion di miembro di e Parlamento di Venezuela, cu mester bandona e pais of busca refugio na embahadanan na Venezuela.
Mas y mas e pregunta ta surgi si mester papia awor di un guera civil na Venezuela cu ta den situacion explosivo y sumamente peligroso pa e region.
