Informacionnan di 2018 di DIARIO ta wordo confirma
*Control posibilidad di AIDS no ta funciona na Venezuela
*Ayudo cu remedi contra AIDS na 2018 a keda den bodega
ORANJESTAD (AAN) — Mientras e desaroyonan na Venezuela for di momento cu Maduro a manipula cu eleccionnan y su relacion cu Rusia a crece na forma bisto, migracion a crece na forma significante. DIARIO a bati alarma pa loke esaki por a nifica pa Aruba, debi na e hecho cu pa basta aña no tabata tin control adecuado pa AIDS.
Informacionnan cu a wordo presenta ayera pa representantenan di organisacionnan Venezolano cu ta combati AIDS, ta indica cu e malesa ta un problema serio pa Venezuela y nan tambe a referi na migrantenan cu a bandona nan pais sin ta na haltura cu nan ta victima di AIDS.
Organisacionnan no gubernamental cu ta apoya personanan cu e malesa a desmenti informacionnan di e oficina di coordinacion di asuntonan humanitario di Nacionnan Uni na Venezuela. A wordo bisa cu a distribui 10 Miyon remedi pa AIDS pa asina sigura tratamento di 50 Mil persona durante tres luna den 24 estado na Venezuela.
E organisacion no solamente a desmenti e informacion pero tambe a mustra cu ta 3.659 persona a haya e remedi di un total di 680 Mil cu e pais a ricibi na december 2018 como ayudo humanitario.
E remedinan ainda no a wordo reparti y ta den bodega.
E informacionnan di DIARIO ta wordo verifica den revelacion oficial di e situacion alarmante cerca personanan cu ta portador di e virus. 17 porciento di mucha te 14 aña di edad cu AIDS, no a ricibi remedi nunca. En total tin 2.100 mucha cu AIDS na e pais. Muhenan cu ta spera yiu no por haci uzo di terapia recomenda.
Manera DIARIO a informa den pasado, for di cuater aña pasa no por haci test pa determina si un persona tin AIDS.
Tin migrante cu tabata uza e terapia di dosis mixto cu tabata recomenda pero no tin posibilidad pa determina si e remedinan cu nan a uza a cumpli cu nan funcion. Pues por tin hende cu a uza remedi na Venezuela y pensa cu nan a recupera, pero esaki no ta e caso.
E informacion cu a aparece ayera oficialmente den publicacionnan Venezolano, ta sostene e alarma cu DIARIO a bati y e insistencia di DIARIO pa testnan medico wordo haci mas ainda teniendo cuenta cu e realidad cruel cu na Venezuela e situacion social a aumenta prostitucion.
E situacion di migrantenan ta contra tur nivel normal di bida y salud loke ta haci cu mester tin control riba posibilidad di AIDS cerca migrantenan.
