ORANJESTAD (AAN): Despues di basta tempo, porfin Aruba lo conoce Olimpiada Escolar un biaha mas.
Durante un conferencia di prensa, Ministro Dangui Oduber di Deporte, a splica cu e apertura di e final lo ta Diabierna 24 di Mei 2019, pa 5’or di atardi den Stadion Guillermo P. Trinidad.
Y e biaha aki, e apertura lo conoce un ceremonia unico y special. Esaki den colaboracion cu IBiSA como tambe Departamento di Cultura.
Jhon Freddy Tobon Montoya tabata un invitado special di IBiSA durante e conferencia di prensa, y el a splica di e plannan pa e ceremonia di apertura. E plan ta grandi, y pesey e ta pidi pueblo pa bin sostene e gran apertura aki.
E Ceremonia lo concentra riba e 4 elementonan di naturaleza, pa stimula hobennan y lanta nan espirito di competencia. Ta bay papia di awa cu ta nifica e limpieza cu e deportista mester pa mantene e proceso di preparacion di competencia, y tambe biento cu ta e aire di rosea pa asina ser por biba cu e alegria pa competi, y tambe e elemento di candela cu ta esun purificador pa bin cu un ceremonia di apertura multi-disciplinario crea cu arte y musica, y arte audiovisual y cu mas di 1.000 hende riba veld.
Segun Jhon Freddy, e lo ta un espectaculo husto pa un apertura di Olimpiada Escolar. Tanto esnan cu participa y publico den tribuna por mira e show grandi aki. E ta felicita tur esnan cu ta trahando riba e ceremonia aki, pa e bira uno exitoso.
