Home CORTE Pastoor sospecha di mishi cu mucha dilanti Hues

Pastoor sospecha di mishi cu mucha dilanti Hues

406
0
SHARE
- Advertisement -

ORANJESTAD (AAN): Diahuebs mainta Corte den Promer Instancia a trata e caso penal cu Ministerio Publico a cuminsa contra e pastoor S., un persona hopi conoci den comunidad.

Fiscal ta acusa S. cu na November 2016, intencionalmente el a mishi cu un mucha muher di 10 aña na su pecho. Pastoor S. ta desmenti di a haci esaki. Ta asina cu na November 2016, pastoor S. a worde interoga y laga liber pendiente di e caso y awor despues di mas cu 2 aña, e caso ta bin dilanti.

ABUSA DI MUCHA:

Den sala di Corte tabata presente mama di e mucha cu familiarnan y tambe amistadnan di Pastoor di inicial S.

Hues a mustra cu e dama G. haci denuncia contra S. Segun e relato di agentenan di KZP, e dama a bisa cu su yiu tabata bayendo pa algun aña caba e school di traimerdia di señora di S.  E pastoor S. ta duna les di cuarta tur diamars.

Riba un diaranzon 9 November 2016, e tata di e mucha a bay busca e mucha y e mama a bay busca e mucha na e tata. E mucha tabata mustra tristo. E mama G. a puntra e mucha kico a pasa. E mucha a cuminsa yora y a puntra si ta laat pa haci denuncia. E mama a graba e mucha. E mucha na yoramento a bisa cu pastoor S. a mishi na su pecho.

El a bisa cu e tabata mirando television su so den e camber di wak television y e pastoor a puntr’e si e kier un deken. E pastoor a hiba un deken p’e y despues e pastor a cuminsa kishiki’e y na dado momento a mishi na su pecho y bay.

Despues e pastor a bolbe y puntra su e por habri e mucha su carson. E mucha a bisa no y e pastor a bis’e pa no bisa nada.

Agentenan di KZP a tende loke e mama a graba e mucha. Nan a interoga e mucha kende a bisa cu 9 November 2016, S. a mishi cun’e na su pecho y a sali. Despues el a bolbe y puntra si e por habri e boton di e mucha su carson y e mucha a bisa no. Segun e mucha, S. a habri e carson y despues a bay.

E mucha a bisa cu e tabata sospecha pasobra e pastor sa tene su man y yam’e su casa chikito.

    PASTOOR TA DESMENTI:

Hues a mustra cu pastor S. a bisa na KZP cu semper e ta hunga cu e muchanan y ta kishiki nan. El a bisa cu e ta tene e muchanan na nan man ora e bay busca nan na school y hiba nan den auto y despues pa e crash. El a bisa cu e tin 16 aña ta haci e trabao aki.

El a bisa KZP cu el a keda sorprendi di e denuncia y a bisa cu e mayornan di e mucha por a yama e y su señora pa puntra kico lo por pasa. El a bisa cu e ta hunga cu tur e muchanan y no sa pakico e mucha ta bay conta cos asina. S. a bisa cu masha poco e ta su so cu un mucha. Tin diferente personanan cu ta guia e muchanan. KZP a confronta pastoor S. cu loke e mucha a bisa. El a bisa cu por ta durante wega e a mishi e mucha pero no tabata su intension di haci algo malo. El a bisa tambe cu e no ta bisa mucha cu ta su casa chikito. El a desmenti di tabata su so cu e mucha den e camber di television y desmenti cu el a bisa cu e mucha si e por los boton di su carson.

  1. a splica Hues su rutina diario caminda e camber di television ta pa muchanan mira television. E ta tira bista pero nunca tin un mucha su so. El a bisa cu e ta kishiki tur e muchanan y hunga cu nan. El a splica cu e ta busca e muchanan y bay cu nan diamars pa duna les di toca cuarta. Hues a bisa cu e ta haya hopi straño cu Polis no a scucha e leidster na e school y otro personanan.

   EXIGENCIA DI FISCAL:

Fiscal a bisa cu casonan di inmoralidad ta causa hopi conmusion. Dia 10 November 2016 mama di mucha a haci denuncia contra pastoor S. cu tabatin un traimerdia. E mucha tabatin 6 aña bayendo e school aki. E tata cu a bay busca e mucha 9 November 2016 a bisa cu el a ripara cu e mucha tabata sin animo. E mama cu a bay busk’e anochi na e tata, a ripara cu e mucha tabata sin animo. Na cas e mama a puntra e mucha si algo a pasa y e mucha a yora y cuminsa conta e mama kico a pasa. E mucha a bisa KZP con S. a mishi cu su pecho. El a splica cu promer a cuminsa kishiki y despues a mishi na su pechonan. S. ta desmenti e acusacion pero na mesun momento ta bisa cu el a kishiki e mucha y tur dia e ta drenta den e camber. El a bisa cu por ta cu el a mishi cu e pechonan di e mucha pero no cu intension malo.

Fiscal a bisa cu segun ley penal, a base di un testigo no por condena un persona. Den un caso inmoral mester tin prueba di sosten. E prueba ta basa riba declaracion di e mucha. Tambe tin cu tanto e tata como mama a mira e mucha tristo. E mucha na yoramento a conta su mama y e mama a grab’e. Na opinion di Fiscal, e declaracion di e mucha ta haya sosten a base di e hecho cu S. a bisa cu e sa kishiki e mucha y cu tur dia e ta drenta den e camber di television. E mucha a bisa cu e tabata su so den e camber y cu S. a bay cerca dje. Fiscal ta haya cu tin suficiente prueba.

Fiscal a bisa cu un traimerdia mester ta un lugar sigur y mayornan mester por confia cu nan yiu ta den bon man. Como pastoor, S. mester tin hopi moral. Fiscal ta haya cu S. a mal usa e confianza cu e mayornan y e mucha tabatin den dje. A tracha integridad di e mucha. Fiscal a tene cuenta cu hopi tempo a pasa promer cu e caso a bin dilanti. El a exigi 140 ora di trabao of 70 dia di prison. Tambe Fiscal a exigi 4 luna di prison condicional cu 2 aña di prueba.

    DEFENSA ABOGADO:

Abogado mr. Marchena a bisa Hues, cu no tin suficiente prueba di sosten. No tin suficiente prueba cu diaranzon S. tabata na e crash. El a bisa cu diamars S. sa busca muchanan pa duna les di toca cuarta. El a desmenti di a mishi e mucha na su pecho. E abogado a mustra cu S. a bisa cu e ultimo biaha cu el a mira e mucha tabata diamars ora el a busca e muchanan pa les di cuarta.

E abogado a bisa Hues cu e tin duda den declaracion di e mucha. E mucha a bisa cu diaranzon e tabata su so den camber di television. S. a desmenti esaki pasobra e no ta diaranzon na e crash y tambe November y December ta luna cu e ta yuda gruponan y ta toca gaita.

E abogado a bisa Hues cu e no ta kere cu e mucha tabata su so. E leidsternan no ta laga e muchanan nan so. Den e camber no tin deken y no tin lugar di drumi. Tin stoel pa e muchanan sinta mira television. Ta straño cu e dia ey e mucha tabata su so den e camber.

E abogado a remarca cu e mucha promer ta bisa e mama cu e pastor a puntra si por habri e boton di carson. Despues na KZP e ta bisa cu despues e pastor a habri e boton. Mr. Marchena a bisa Hues cu e ta kere cu esaki tabata un storia di e mucha pa e bay un otro crash. Hues sera tratamento di e caso y a bisa cu e ta bay studia e caso y lo dicta sentencia 6 Juni 2019 pa 8.15 di mainta.

- Advertisement -

DUNA COMENTARIO

Please enter your comment!
Please enter your name here