Home Gobierno Prome Minister Evelyn Wever-Croes na conferencia di e-Governance na Estonia

Prome Minister Evelyn Wever-Croes na conferencia di e-Governance na Estonia

71
0
SHARE
- Advertisement -

ORANJESTAD (AAN): E siman aki Prome Minister Evelyn Wever-Croes lo ta atendiendo e ‘e-Governance Conference’ na Tallin, Estonia. Un evento pa lidernan rond di mundo cu tin innovacion den gobernacion como prioridad.

Prome Minister a worde invita personalmente pa atende e conferencia aki y comparti Aruba su vision y plannan pa futuro. Alavez e lo ta miembro di un panel tocante e beneficionan di cooperacion entre paisnan chikito riba tereno di e-Governance.

Como parti di Prome Minister di Aruba su bishita na Estonia, tin varios reunionnan plania cu entre otro, Presidente di e Republica di Estonia, Señora Kersti Kaljulaid; e Chief Information Officer di Estonia, Sr. Siim Sikkut; e Embahador Hulandes na Estonia, Señora Karen van Stegeren; y diferente Ministernan cu tambe lo ta atendiendo e conferencia. Cu e participacion di Prome Minister riba e tarima internacional aki lo pone Aruba riba plataforma internacional di e-Government y habri portanan pa colaboracion entre paisnan pa por tin acceso na mas recurso y asina acelera e vision pa Aruba.

Prome Minister lo ta parti di un panel cu lo enfoka riba beneficionan di cooperacion entre paisnan chikito y e panel lo worde modera pa Sr. Hannes Astok, kende ta Director di Estonia su e-Governance Academy.

Estonia ta conoci mundialmente pa tin un Gobierno completamente digital y ta disponibel pa comparti experticio y conocimento cu Aruba riba e topico aki. E aña aki e ‘e-Governance Conference’ lo enfoka riba diferente ‘road maps’ y innovacionnan cu gobiernonan di diferente pais ta usando pa yega na nan metanan digital, cu un atencion special riba cooperacion den e proceso di e transformacion digital. Delegacionnan di diferente pais lo ta atendiendo e conferencia aki, y tambe companianan cu ta ofrece solucionnan y cu ta asisti den e proceso di implementacion.

Manera ya ta conoci caba, Gobierno di Aruba tin un compromiso pa transforma den un Gobierno pro-activo, un e-Government, y actualmente ta finalisando un ‘Road Map’ pa defini e stapnan concreto cu mester worde tuma den e prome fase. E Road Map cu ta den desaroyo cu ayudo di expertonan di Estonia y stakeholders local ta incorpora diferente strategianan pa digitalisacion.

Tambe lo inclui plannan di accion existente, maneho di futuro, y e vision cu lo acelera e proceso pa yega na un eGovernment. Un e-Government y un Gobierno mas eficiente y digital lo resulta den menos burocracia, mas transparencia y un miho servicio na nos comunidad. Esaki ta puntonan cu Gobierno a priorisa den e acuerdo di gobernacion ‘Hunto pa Aruba 2017-2021’.

- Advertisement -

DUNA COMENTARIO

Please enter your comment!
Please enter your name here