ORANJESTAD (AAN): E ta algo cu sa pasa de vez en cuando riba Aruba. Vandalismo na canchanan di deporte. Y ainda no ta compronde e motibo.
Hopi biaha, teamnan ta yega pa train nan deporte favorito, y ta descubri cu kizas den madruga un chauffeur anti-social a subi tereno cu su vehiculo, pa asina take off, slide cu su auto riba e tereno, lagando e veld na werki, y dificil pa hunga futbol of baseball riba dje.
E siman aki e situacion tabata peor na Savaneta. Hendenan desconoci sea Diaranzon anochi of Diahuebs madruga a subi tereno di SV La Fama, y a causa hopi daño, principalmente na e goalnan cu ta wordo hopi usa pa e teamnan hubenil di U7, U9, y U11.
Na forma desconoci, nan a dobla e framenan di aluminium cu tin pa e goalnan di diferente team di muchanan chikito. Fuera di esey a horta e netnan di e palonan di goal.
Esaki ta stroba training inmediatamente! E potret aki a wordo saca na momento cu e muchanan di Divisionnan Hubenil di La Fama, riba nan mes tabata trata na drecha un di e goalnan, pa por lo menos nan por a train e atardi ey.
Polis a wordo yama y a bin tuma nota di e destruccion aki. Cualkier persona cu por a mira algo, of cu sa algo di e vandalismo cometi aki riba tereno di SV La Fama na Savaneta, ta ser pidi pa yama e Tipline di Polis na 111-41.
