Ibero American High School a ofrece ayudo psicologico na victima di violacion
ORANJESTAD (AAN): Director di Ibero American High School, William Centeno, a confirma den un rueda di prensa diahuebs mainta cu un studiante di nan scol a bira victima di violacion.
Esaki a sosode ora cu e mucha muher di 15 aña a wordo viola door di e persona cu tabata encarga cu IT di e scol.
Manera DIARIO a trece dilanti caba, tin prueba di mensahenan unda e persona aki tabata manda puntra e mucha muher pa potretnan di su pechonan y tambe tabata papia den un forma inmoral cune.
Segun locual e mucha a duna di conoce, e violacion a sosode na e cas di e homber aki, cu tabata ofrece su mes, como experto den computer, pa yuda e muchanan cu proyecto di sol. Net e dia ey, e mucha muher lo a bay cas di e homber, keriendo cu tin mas studiante eynan, pero e plan tabata otro.
Durante e conferencia di prensa, Director Centeno a laga sa cu a base di un investigacion interno haci, a bay over na despedi e IT manager, pero cu nan no a pensa den haci un denuncia na polis ya cu nan no a haya esaki necesario mirando cu e persona a wordo retira for di scol.
El a enfatiza cu e scol a realiza nan propio investigacion y nan sa tambe cu autoridad tambe ta haciendo nan investigacion. A base di nan mesun investigacion nan a dicidi di proteha e mucha muher pasobra e ta e victima.
Mientrastanto, e scol no a haci ningun denuncia oficial na ningun autoridad of instancia. E cabezante di Ibero American High School a expresa cu nan ta kere cu esey no tabata necesario. Nan ta esun cu a contrata e persona y nan mes tabata esun yama pa haci e despido, a señala.
A sigui bisa cu pa loke ta e mucha muher, e scol a ofrec’e pa e haya ayudo psicologico gratis. E por yama e psicologo ‘anytime’, 24/7, a agrega.
Durante e conferencia, prensa a cuestiona Sr. Centeno pakico e no a haci denuncia na polis. El a bisa cu e motibo ta pasobra polis tabata envolvi den e caso y e caso tabata den man di polis. Polis tin cu haci loke nan mester haci y scol a haci loke mester a haci, a indica.
Director Centeno ta di opinion cu loke scol mester a haci ta deal cu e problema internamente. Segun e director, e mama a bay polis y a acerca e servicionan social. Polis tabata na scol tambe segun e director. Tambe e trahado social tabata tey na scol. No ta algo cu polis no tabata sa di dje.
Cuerpo Policial, a duna di conoce cu no tin un keho oficial haci relaciona cu e caso aki. Mama no a entrega keho ainda.
Buenos dias quisiera saber si existe alguna entidad que tenga contacto con un juez en caso civiles cuando un juez dicta una sentencia sin conocer argumentos reales de un caso .donde se emite informacion falsa de un abofado para cobrar honorarios super altos a una persona con invaludes laboral.ya que buscado normal abogados se protegen entre si y llegar a un tribunal sin abofado no es facil tarda meses.agradeceria su informacion.