E por bira un reunion publico:
ORANJESTAD (AAN) — Presidente di Staten mr. Ady Thijsen, a declara den un entrevista cu DIARIO, cu Diabierna cu a pasa e tambe a baha papia cu e personanan di Traimerdia, cu a bin Oficina di Gobierno, pa entrega un manifiesto na Prome Minister.
E mes a pidi nan pa saca un copia pa Parlamento tambe tin e manifiesto y mustra nan asina, cu e asunto aki tambe ta concerni Staten, y e copia aki a keda entrega na sr. Edgard Vrolijk.
Parlamentario mr. Thijsen a subraya cu e mes ta haya cu e problema aki ta hopi serio, y ta bay trata den un reunion awe, Diaranzon 19 di Juni.
Presidente di Staten ta boga tambe pa un reunion publico, pasobra e mester wordo trata cu e minister, pa asina crea un dialogo cune minister. E ora ey e minister ta duna su informacion y cual ta su posicion.
Duna e stap aki ta e pensamento di mr. Thijsen, y ta su decision pa cual e ta para pe. Asina el a remarca.
E trahadornan por bin na e reunion publico y scucha e combersacion unda e minister ta pone su posicion, y na unda e tin cu clarifica cierto aspectonan.
El a comenta cu mester crea tempo y espacio pa e asunto aki wordo soluciona. Incluso hasta por ta cu no ta necesario mas pa bay den un reunion publico pasobra den e ‘bijeenkomst’ mes e minister bisa “asina aki ta bay ta”…y tur hende bisa cu asina ta ok.
No obstante ainda tin e posibilidad pa un reunion publico cu por atende cune. Tuma un decision ta algo hopi importante den e caso aki, pero mester bay cauteloso, evalua tur cos, y wak pa tin algo sigur y no den pura. Y si tin un reunion publico pa tur hende tey den e tribuna pa por scucha.
