Home Hudicial Jairo Chalgut a confesa na Hof cu e ta corda cu el...

Jairo Chalgut a confesa na Hof cu e ta corda cu el a mata Sarahi Sierra

7502
0
SHARE
— Pueblo lo no lubida e simpatica Sarahi nunca.
- Advertisement -

• Awor kier hisa castigo di 20 pa 28 aña.

ORANJESTAD (AAN): Despues cu el a desmenti den Corte den Promer Instancia cu el a mata na un forma hororoso e dama Sarahi Sierra, den Corte Superior, e homber Jairo Chalgut a confesa.

Chalgut awor a bisa Hof (Corte Superior) cu e ta corda cu e tabata na e caso y tabatin un discusion cu Sarahi y cu el a mat’e. Hof tabata kier haya sa detayes con tur cos a sosode pero Chalgut a bisa cu e no ta corda. Aparentemente su consenshi a remorde y tur e tempo sera den KIA a pone cu el a dicidi di papia e berdad.

   MATA Y NO ASESINATO:

Dia 28 September 2019, Hues di Corte den Promer Instancia, a duna un splicacion amplio pakico e no ta haya prueba asesinato. E acusacion cu Fiscal a presenta contra Chalgut ta: – a mata intencional, – subsidiario, a viola e victima cu consecuencia cu e victima a fayece, – mas subsidiario, a mata y viola y horta cu violencia y a secuestra e victima Sarahi, un dama hoben di 19 aña.

Fiscal a conclui cu por declara prueba cu e sospechoso Chalgut a mata e victima o sea e promer acusacion y a exigi pa condena e sospechoso na bida largo den prison.

E sospechoso ta desmenti di a haci e delitonan cu e ta worde acusa di dje. Su abogado mr. Illes a pidi pa declara J.A.C. liber di e acusacionnan.

Hues ta mustra cu for di e pruebanan por compronde cu Sarahi riba 3 November 2017 entre mas o menos 7:40’or di mainta te cu 10:00’or di mainta, a worde mara den su propio cas, viola y mata. El a worde mara na su pols y enkel cu un tape transparente, un waya di coriente bruin y un veter preto. Su boca a worde tapa cu un tape transparente.

E tape aki a worde pasa mas cu 10 biaha rond di e cabez, boca y nek di e victima. A pone un saco di plastic over di e victima su cabez y na su nek e saco a worde mara sera.

Sarahi a worde hinca cu un cuchiu na su nek y a worde bati cu forza na su cabez y cara. Sarahi a worde viola y a fayece door di stik of choca.

A haya muestranan di DNA riba e saco di plastic cu tabatin over di e cabez di Sarahi. E muestra tabata na konopi cu a mara na altura di e nek pa sera e saco. A haya tambe muestra di DNA riba e waya di coriente bruin, e veter preto cu a usa pa mara Sarahi na su pols y enkel. A haya muestra di DNA riba un pida tape transparente. Tambe a haya muestra di DNA riba un pida huña cu tabata bao di curpa di Sarahi. Ademas a haya muestra di DNA na e huñanan di man robez di Sarahi esta su duim, su dede di mustra, su dede mey mey y su dede di renchi. Riba curpa di Sarahi a haya sperma for di cual a haya DNA.

Cu e sospechoso ta e culpable por saca for di e declaracion di e bisiña di Sarahi y un conoci di e sospechoso. E bisiña a declara cu 3 November 2017, mas o menos 7:20’or di mainta el a mira un homber den cura di Sarahi para. E bisiña ta kere cu e homber ta e sospechoso Chalgut.

Hues di Corte di Husticia a splica pa dicidi riba e cantidad di castigo, Corte a tene na cuenta cu e sospechoso a mara un mama hoben den su propio cas, a viol’e y na un forma hopi hororoso a kita su bida.

Chalgut a laga Sarahi sin bida den e cas sabiendo cu Sarahi su hendenan lo bin hay’e. Den e caso aki ta e ruman muher chikito di 13 aña a haya Sarahi morto den e cas. For di e heridanan na Sarahi su pols y enkel ta mustra cu el a lucha pa su bida. Corte ta haya cu e derecho mas fundamental cu un hende tin, a worde kita for di Sarahi. A causa un daño irreparable cerca e familiarnan, en especial e yiu homber chikito di Sarahi, su mayornan, su rumannan muher y su partner.

E incidente aki a conmove henter comunidad y a causa sentido di inseguridad den e comunidad Arubano. Corte ta tene na cuenta e conclusion di psychiater cu Chalgut ta responsabel pa su actonan y cu e chens pa algo asina ripiti ta mediano pa halto. Corte ta tene na cuenta e carchi di castigo di Chalgut caminda el a yega di worde condena pa un atraco.

   20 AÑA DI PRISON:

Hues di Corte di Husticia a bisa cu e seriedad di e hechonan, e impacto grandi cu esaki a causa pa e familiarnan y comunidad, e chens grandi cu e lo por bolbe haci algo asina, e punto di bista cu mester haci husticia y cuida comuidad, ta hustifica un castigo di prison pa un tempo largo.

Corte no ta haya legalmente y convicente proba e promer y di dos acusacion y ta declara Chalgut liber di esakinan. Corte ta haya legalmente y convicente prueba e acusacion di secuestra, viola y mata y ta condena Chalgut na 20 aña di prison, kitando e tempo cu e ta sera caba den KIA.

   PG A EXIGI 28 AÑA:

Ta asina cu Chalgut a apela e sentencia y e siman aki esaki a keda trata den Corte di Husticia di Aruba. Durante tratamento di e caso, Chalgut a bisa Hof cu e ta corda cu riba 3 November 2017, e tabata na e cas di Sarahi mainta y nan tabatin un discusion. Chalgut a bisa Hof cu el a mata Sarahi. Hof a haci Chalgut diferente pregunta pa saca afor con e matamento hororoso a sosode, pero Chalgut a bisa cu e no ta corda con el a haci esaki.

Procurador General a bisa Hof cu e ta haya legalmente proba cu Chalgut a mata Sarahi. Ta asina cu anterior Fiscal a exigi bida largo pero Procurador General no a exigi esaki. Procurador General a exigi 28 aña di prison cu ta mucho mas halto cu e condena den Promer Instancia.

Abogado mr. Illes a hiba su defensa y awor Hof di Corte Superior ta bay studia e caso y otro luna lo por spera sentencia.

- Advertisement -

DUNA COMENTARIO

Please enter your comment!
Please enter your name here