CITGO: un centro di crimen mester a salba Aruba

    236
    0
    SHARE
    - Advertisement -

    Analisis

    2009-2019 E conclusion di e desgracia di Aruba

    Den e edicion di awe, DIARIO ta trece loke lamentablemente mester bira complementacion di un investigacion di un aña. DIARIO awe ta demostra, cu e no ta presenta casonan na publico si no ta basa riba prueba y documentonan oficial.

    Nos sigur no ta uza informacionnan importante ni maluza nos trabou, pa beneficia nos mes a costo di un comunidad cu a sufri durante e ultimo decada na un forma cu hamas el a pensa cu e lo sufri.

    Awe, dies aña despues cu Aruba tabata prepara pa entrega futuro di Aruba na un gobierno nobo durante eleccion, nos mester presenta e conclusion di un decada.

    Den Corte na Merca, un caso a wordo presenta. Un di e hopi casonan criminal cu lo papia di e compania cu a wordo uza pa e wega di mas horibel cu politica a hunga cu Aruba den historia di e pais.

    Awe DIARIO ta uza documentonan pa splica Aruba, kico a pasa cu Aruba y pa pidi Parlamento, Gobierno y Husticia, tur e organonan di estado pa actua y haci husticia cu Aruba.

    E refineria na San Nicolas awe ta bira simbolo con bofon por wordo haci di un pueblo cu a comete e pica di kere den un supuesto lider politico, cu tabata aspira e titulo di votegetter.

    El a ricibi e votonan cu e tabata kier na 2009 pero na 2017 el a perde e mayoria absoluto cu a permiti pa e pagina mas scur di historia di Aruba wordo skirbi.

    Awe DIARIO ta presenta e documento cu a wordo entrega na Corte na Houston dor di Marisol Gonez, kende Nicolas Maduro a nombra na Citgo.

    El a yega Citgo na momento cu Gobierno Mike Eman tabata bati na porta di e compania dirigi pa Nelson Martina un di e figuranan cu mester a trece un bonansa pa Aruba.

    Gobierno Mike Eman a entrega Aruba na Nicolas Maduro, cu no solamente a hipoteca propiedad di su pais, pero a permiti ladronicia y corupcion destrui su pais.

    Citgo, cu a uni Aruba cu un despota y un regimen cu a produci un crisis mundial, awe ta wordo investiga pa criminalidad cu ayudo di regimen Maduro.

    Awe Aruba ta puntra Mike Eman y su partido, cu ki cara nan por enfrenta pueblo ainda. Awe Aruba ta puntra tur instancia, si no mester investiga loke a pasa.

    Awe nos ta entrega Aruba un documento di un dama, cu tabata parti di e scenario di Citgo, di Maduro, di Martinez y henter e grupo di Citgo, cu a hundi Aruba.

    Awe nos ta entrega Aruba prueba di falsedad politico cu casi a destrui nos pais.

    Con por ta posibel cu e compania cu mester a bin salba Aruba, tabata tin laso cu mundo di droga y criminalidad?

    E documento ta papia y ta confirma investigacionnan cu ta tuma luga rond mundo.

    DIARIO a haci su trabou. DIARIO a cumpli y lo sigui cumpli cu su tarea. Awor ta na tur instancia oficial pa haci nan trabou.

    Esaki Aruba merece? Esaki tabata bon pa Aruba? Tristo loke a pasa cu e pais, cu ayera a lucha pa un futuro di dignidad y awe mester yora di berguensa.

    - Advertisement -

    DUNA COMENTARIO

    Please enter your comment!
    Please enter your name here