Home Editorial Editorial: Enseñansa mester sirbi e mucha, e famia y e pais

Editorial: Enseñansa mester sirbi e mucha, e famia y e pais

5
0
SHARE
- Advertisement -

Segun indicacionnan, enseñansa lo haya basta atencion durante e siman aki. Esaki debi na e actual desaroyonan rond di e proyecto Tra’i Merdia.

Nos a sigui e proceso basa riba un conflicto di loke mester pasa y loke no mester pasa cu un parti importante di nos sistema escolar.

Nos a haci nos investigacionnan cu lo duna como resultado un bista total di loke ta necesario pa adapta den nos sistema di enseñansa, cu mester sirbi e mucha, e famia y e pais.

E tres elementonan separa pero directamente relaciona cu otro, tabata basa pa nos investigacion. Kico mester pasa pa enseñansa ocupa e puesto central cu e tin den desaroyo di Aruba?

Pa cuminsa mester bolbe na loke tabata tin for di inicio na Aruba. Nos pais ta conoci pa su sistema educativo y escolar halto. Si na otro paisnan den nos region, analfabetismo tabata algo cu mester a supera, na Aruba e tabata un excepcion.

For di edad tempran, e Arubiano a cuminsa siña lesa y skirbi cu ta apertura pa e sistema escolar pero tambe e nivel di bida cu un dia e mucha mester tin pa e por ta feliz den su comunidad.

Aruba ta papia di Aruba, ta papia di Aruba y no di sistemanan cu mester cuadra cu pensamento di cualkier otro parti di mundo. Pa Aruba por ta central den nos sistema di enseñansa, e mester ta dirigi riba e mucha cu identidad Arubano, e famia Arubano heredero di un cultura cu su base den educacion y finalmente e comunidad di Aruba cu mester inverti den educacion como vehiculo pa formacion di mucha.

Aruba ta parti di un mundo cu a conoce cambio den participacion di ciudadanonan. Reglanan cu mundo civilisa na cual Aruba ta pertenece a adapta, ta exigi pa tene cuenta cu e cambionan cu a tuma luga den famia, cu ta central pa e mucha.

Den pasado e mama no tabata participa na e proceso laboral den mayoria di caso. Caminda tabata necesario, mamanan tabata yuda den e sosten di nan famia cu pastechi, bolo, cose pa menciona algun area di trabou di e sexo femenino.

E mama tabata na cas pa e mucha te na momento cu e mucha drenta e sistema escolar na edad di seis aña. E mama tabata e prome educador di e mucha y principio di su desaroyo.

Na momento cu e mama a cuminsa traha pafo di cas y a bira mas activo den comunidad, un problema a surgi. Un circulo nobo a presenta su mes den comunidad, cu a mira damanan ocupa luga cu tabata exclusivo pa hende homber. Damanan a bira profesional y a cuminsa ocupa puestonan cu no tabata mara na nan estado civil di soltero of di sexo.

Den tur famia tabata tin madushi y tantanan cu tabata disponibel pa yuda cu e prome cinco aña di un mucha. Esaki a stop di ta e realidad.

E necesidad pa mamanan cu mester a bandona nan cas pa bay traha, a crea e necesidad pa un trai’ merdia. Un luga pa muchanan keda despues di merdia.

Na principio no tabata tin regla pa e centronan cu tabata cuida mucha merdia. Ademas e no ta parti di enseñansa oficial. E calidad ta depende di e placa cu e mama tin pasobra e no ta obligatorio. Placa cu e mama ta gana pa yuda su famia, mester bay pa e centronan cu no tabata tin trahado profesional den e sector di enseñansa pero tabata haci e trabou cu antes tabata di madushi.

Awor kico mester pasa? Mester crea un totalidad pa enseñansa. Mester dicidi for di cual edad, enseñansa ta cuminsa y kico e exigencianan ta. Mester duna mamanan un oportunidad pa bay traha trankil, sabiendo cu nan yiu ta bon cuida.

E contesta ta, pa na prome luga bolbe na e sistema di antes di school te 3or. Departamentonan di Enseñansa y Social mester mira con por yega na un proceso laboral den cual caminda ta posibel, e mama por traha tambe di 7or pa 3or di atardi.

Pues “despues di school” ta bira “school” cu ta bolbe na e sistema di antes cu mas tempo pa dedica na cada mucha. Nos mester bolbe na loke tabata funciona bon pa mucha y ta kita gasto grandi di e famia.

Mester yega na un concepto nobo na cual edad, enseñansa mester cuminsa pa muchanan teniendo cuenta cu nos normanan y balornan.

Pues e solucion no ta kico ta bon pa Ministro ni trahado, pero kico ta bon pa e mucha, e famia y e pais. No mester lubida cu e mucha lo bira e miembro di comunidad, cu mañan ta percura pa e pais funciona. Mas halto calidad di su preparacion miho pa e pais cu ta inverti placa den loke ta sirbi interes di e pais, nos Aruba cu hasta den tempo moderno ta keda Aruba.

- Advertisement -

DUNA COMENTARIO

Please enter your comment!
Please enter your name here