Home Editorial Editorial: Un Aruba trankil y feliz no ta sirbi oportunismo politico...

Editorial: Un Aruba trankil y feliz no ta sirbi oportunismo politico pero tur Arubiano

53
0
SHARE
- Advertisement -

Awe Aruba ta bolbe na uno di e momentonan importante den su historia. Un momento, cu oportunismo politico kier domina e panorama di un pueblo cu a hiba un lucha historico pa duna prueba cu su dignidad ta bini na prome luga.

Dignidad ta un palabra grandi y hopi bes ta wordo maluza pa loke por wordo considera pio cu oportunismo politico y por baha te na nivel di prostitucion politico.

Aruba sigur ta un pais cu por papia di orguyo y dignidad, pasobra e no a acepta di come for di man di otro paisnan pero a exigi pa e ta liber pa sembra su cunucunan y asina come loke e ta produci.

E identidad Arubano ta rechasa oportunismo y prostitucion politico pasobra e ta contra e curason di Arubianismo segun cual ni e Arubiano ni Aruba por bende su mes pa haya placa, posicion y puestonan di honor pa glorificacion personal.

Awe na momento cu Aruba atrobe ta dilanti porta di e berdad di loke a na un crisis cu hamas Aruba a soña di conoce, problema ta wordo origina riba tur tereno y por nota un strategia pa kita bista for di loke merece tur atencion pa crea caos.

DIARIO tin un tarea sagrado pa guia Aruba y a demostra esaki durante e ultimo aña y hustamente na e momento cu Aruba mester a bira victima di e abuso gubernamental mas grandi cu e pais a yega di conoce.

Mester papia di prostitucion politico cu ta caracterisa su mes pa e fenomeno politico, cu no tin ningun midi di balor, ta brasa y sunchi tur loke por sirbi su interes financiero y publico.

Prostitucion politico ta deshaci di e dignidad di un pueblo. Venezuela ta un prueba. Un grupo di politico ta bende su mes y e pais na paisnan grandi y poderoso cu ta haya poder riba e pais y ta destrui e pueblo.

Kico a pasa Aruba, cu a wordo tolondra dor di un partido politico, cu a yama su mes “amigo pa semper” di “Bo Aruba”? Nan nomber ya mester tabata motibo pa Aruba no confia nan. “Bo Aruba” no ta “Nan Aruba”.

E Aruba di Arubianonan no ta un pais barata, cu a perde su cara na Hulanda cu wega barata. Aruba a perde su cara, cu tabata motibo pa cual sacrificio grandi a wordo haci pa yega na 1986 ora hasta a acepta e reto di independencia basta e Arubiano no mester a soporta loke ta pasa awor na Venezuela, caminda stranhero cu placa ta tira cuminda cu resta pa pueblo Venezolano come.

Si un dia Aruba a entrega politiconan e encargo pa deshaci di e cabuya Antiano na garganta di Aruba, tabata pa e sentido di honor di un pueblo cu a pasa den miseria pero no tabata kier pa prostitucion deshaci di su dignidad.

Na 2009 Aruba a wordo hinca den un trampa cu a kibra Aruba. A kita diripiente mita di e entrada di e pais na BBO, loke a duna motibo pa e pais haci un debe enorme pero tambe pa e pais tabata tin mas urgencia pa bay busca entrada nobo.

Asina a introduci e proximo trampa di proyectonan PPS y finalmente Citgo.

Ora e resultado di BBO ya a desgracia Aruba manera por a spera y Hulanda mester a pone Aruba na waterpas y balansa atrobe, e pais mester a deshaci di su autodeterminacion cu tabata e lucha pa kibra 12-8 cu a entrega Aruba un tempo na Antia manera awe Maduro ta entrega Venezuela na Rusia y China.

Aruba a surpasa esaki y na man di Betico Croes a bringa pa su dignidad, cu ta libertad pa un pueblo gana su pan cu sodo di su frenta.

Durante 2009 pa 2017, e “amigo pa semper” a bolbe bati Aruba cu a wordo hinca den man di Nicolas Maduro y e mentalidad di prostitucion basta placa drenta pa dirigentenan politico.

Awe DIARIO ta lanta para. DIARIO lo sostene e proceso pa yega na solucionnan di problemanan, cu no ta unico na Aruba pero na tur pais cu mester adapta nan enseñansa, mester biba cu resultadonan di un economia mundial, por ehempel.

Nos ta rechasa tur intento pa oportunismo politico cu a bira prostitucion politico, deshaci di e desenlace di Citgo cu ta e berguensa mas grandi den historia di un pueblo cu dignidad den su bandera manera ta e caso di Aruba.

Hunto cu Aruba, nos lo deshaci di e berguensa politico cu kier destrui Arubianismo pa e kibra Aruba.

Nos atencion lo keda dirigi riba solucion pa Citgo y pa e crisis financiero cu gobierno Mike Eman a laga atras. Nos lo sigui lucha cu Aruba pa un futuro trankil pa un pueblo cu semper a obra a base di dignidad y dia Prome di Januari 1986 a canta final di traicion, opresion dor di mente diferente na esun di Aruba, pa a subi e caminda di dignidad.

Nos ta invita Aruba pa ban sigui cana riba e caminda cu ta hiba na un futuro nobo pa e pais.

- Advertisement -

DUNA COMENTARIO

Please enter your comment!
Please enter your name here