Home Editorial Editorial: Un feliz Dia di Tata, Aruba!

Editorial: Un feliz Dia di Tata, Aruba!

39
0
SHARE
- Advertisement -

Dia di Tata e aña aki ta topa cu un Aruba cu ta atende cu hopi caso cu directamente ta relaciona cu e figura di tata.

Segun tradicion di Aruba, tata ta e cabes di famia. Tata ta representa un siguridad pa su famia. Den casnan sin tata, hopi bes ta referi na e mama como esun cu ta mama y tata, loke ta pone nos comprende cu tin un tarea special pa e tata.

E momento a yega pa confirma e posicion di tata den un famia, cu actualmente mester di tur e elementonan cu nos ta atribui na un tata, pa por sobrevivi.

Tata ta duna su famia su identidad segun tradicion di e famia Arubano.  E tata tabata percura pa proteccion di su famia. E tabata uza e aspectonan mas bien atribui na e ser masculino, manera forsa, pa proteha su luga pero tambe pa impone respet pa su famia. Ora bisa cu tin un tata den cas, esaki ta nifica mas cu e hecho cu tin un homber sinti den e cas.

E tata ta referi na e normanan cu mester aplica enfrente su famia y e trato cu e ta spera cu cada hende lo duna su famia.

E tata ta defende su famia y pa esaki tabata posibel, e famia mester a evita tur loke por a causa berguensa na un tata cu ta sali dilanti na defensa di honor di su famia.

E tata ta percura pa e famia. Segun tradicion di Aruba, na cual semper nos lo tene y cu semper nos lo defende como e parti esencial di Aruba, e tata tabata percura pa e entrada mas importante di e famia y pa asuntonan basico.

For di prome cu e tata bira tata, ya tabata percura pa tin cas y tur loke ta basico pa felicidad di un famia. E tabata parti di e preparacionnan pa un matrimonio.

Awe Aruba mester di famia como su instituto mas sagrado y Aruba mester di e tata na su luga den e famia Arubano.

Hopi problema cu tin actualmente na Aruba lo disparce na momento cu e figura di tata bolbe bira e figura describi mas ariba.

Na momento cu un tata ta tata segun e tradicion di Aruba, e ta manda den e cas a base di balornan halto di e comunidad.

E tata ta na haltura kende ta drenta e cas y kende ta atende cu su yiunan. E personanan cu tin amistad cu e yiunan, ta tene cuenta cu e normanan y balornan di e famia y si nan no ta comporta, lo mester atende cu e tata.

Pasobra e prome proteccion cu e tata lo duna su yiunan, lo ta e conocemento di loke ta bon y loke ta malo. E tata lo educa su yiunan na un forma cu nan lo bira hende cu ta demanda respet pasobra nan sa kico ta respet y ta actua a base di respet.

E proteccion cu e tata ta duna su yiunan lo habri caminda pa nan pa futuro. Nan ta hende fuerte cu tin sosten di nan tata pa asumi nan luga den comunidad.

E tata ta nan ehempel, nan inspiracion, nan interpretacion di norma y balor.

Awe ta dia di tata. Ta un momento pa entrega na e generacion hoben, e luga cu un tata mester tin den famia y splica pakico esey ta sosode.

E tata semper mester ta e forsa di e famia, loke tanto pa loke ta trata e tata como e otro miembronan di famia, mester ta un realidad.

Pa nos restructura nos comunidad y a base di nos normanan y balornan pone Aruba atrobe riba e rumbo cu nos kier, tata no mester ta forsa bruto, pero un man amigo y di confiansa real. Tata mester inspira contra abuso, crimen, falta di respet di su famia pa e por ta e wardado di su famia.

Den e situacion cu Aruba ta actualmente e figura di tata mester sali dilanti y bolbe eleva su mes. E tata cu ta haci su mes respeta, ta bira e baluarte di su famia.

Cu Dios, tata di nos tur, awe drama bendicion riba Aruba ta nos deseo grandi pa hunto nos drenta e fin di siman di Dia di Tata. Pabien na tur tata!

- Advertisement -

DUNA COMENTARIO

Please enter your comment!
Please enter your name here