ORANJESTAD (AAN): Renaissance Convention Center a bira centro di moda cu bunita presentacion di nos mucha y hobennan special cu a cana riba pasarela hunto cu celebridadnan, organiza pa Fundacion Sea Bunita Sea Bo Mes.
Esaki ta di 4 aña cu Fundacion Sea Bunita Sea Bo Mes a organiza e evento aki. Un anochi cu a combina canto, baile, declamacion di poesia y e famoso pasarela, unda por a aprecia e talento di nos muchanan y hobennan special.
Reina hubenil di Aruba su Carnaval, Ilaijah Catalina Croes, kende durante carnaval a demostra su talento y a conkista curazon di huradonan, logrando e titulo di Reina Hubenil di Aruba 2019 y Shawndre Geerman, kende a representa Aruba varios biaha internacionalmente tambe tabata presente.
E hobennan super inteligente cu bendicion special, a wordo acompaña pa celebridadnan di Aruba, cu semper ta cla pa duna nan sosten pa cu mucha y hobennan special y cana cu nan riba pasarela den Renaissance Convention Center.
Fundacion Sea Bunita Sea Bo Mes a gradici cada un di e patrocinadornan y esnan cu di un manera of otro a contribui pa haci e anochi aki uno inolvidable.
