Home Hudicial 14 aña di prison exigi pa chofer di e auto for di...

14 aña di prison exigi pa chofer di e auto for di cual a tira Ski mata

231
0
SHARE
- Advertisement -

E hoben a lanta para y pidi yiu di Ski sorry pa loke a sosode

ORANJESTAD (AAN) – Ayera mainta e hoben R.N. (19) sospecha di ta complice di asesinato di Ski riba 18 Augustus 2018 a presenta dilanti Hues. El a scucha Fiscal exigi 14 aña di prison. Abogado mr. Illes ta haya cu mester declara R.N. liber mescos cu e sospechoso W., pasobra e no tabata sa nada di cu lo bay tira y no a bisa e muher Q. pa tira.

SOSPECHOSO TA NENGA DI TABATA SA

Den sala di Corte tabata presente e mayornan di R.N. y e yiu homber di Ski, acompaña pa su amiga. Fiscal a bisa cu R.N. ta wordo acusa di complice di asesinato di Ski, intento di asesinato di tres persona. Tambe Fiscal ta acusa R.N. di posesion di arma di candela cu balanan.

Hues a mustra cu na Maart 2019 e caso a wordo posponi pa laga psikiatra traha un raport. Awor raport ta cla.

Hues a bisa cu e caso a cuminsa ora cu 18 Augustus 2018, Polis a bay den Rancho pa un tiramento den Ranchostraat caminda Ski a wordo tira y el a core bay riba su bicicleta pasobra e no tabata kier bay den ambulance. A haya 3 huls di bala na e lugar unda e tiramento a sosode. Dia 20 Augustus 2018 na altura di The Paddock, Ski a fayece riba acera. Patologo a constata cu e causa di morto ta door di tiro cu a perfora e tripa cu a causa venenamento di sanger y tambe tranca e tripa.

PIDI DISCULPA NA YIU DI SKI

Ta asina cu R.N. tabata stuur e auto. R.N. a lanta para den sala di Corte y a pidi sorry na e yiu homber di Ski pa loke a pasa. El a bisa cu no tabata e intension pa tira Ski mata.

NO A BISA PA TIRA

R.N. a bisa cu ora cu e tabata stuur e auto, el a tende 3 tiro y el a spanta. El a bisa cu nan tabata trip y a bay pasa den Rancho. E muher Q. a bis’e pa pasa un biaha mas y a tira. Despues Q. a bis’e pa core bay. R.N. a bisa cu nan tur tabata bebi y droga.

Hues a bisa cu for di e declaracionnan di e otronan envolvi por compronde cu tur hende tabata sa cu tin un arma. Q. a bisa cu el a puntra varios biaha si e mester tira y tur den auto y hasta R.N. a bisa pa tira. R.N. ta para riba cu e no a scucha Q. bisa nada y e no a bisa nada. Hues a bisa cu tempo di e incidente R.N. tabatin 18 aña.

ALEHA DI MAL AMISTAD

Hues a bisa cu e raport psicologo ta mustra cu R.N. tin bon relacion na cas. Psicologo ta haya R.N. responsabel y e chens tey cu e por bolbe haci’e. E psicologo a pidi raport di psikiatra pasobra R.N. ta cambia hopi liher di caracter. Hues a bisa cu psikiatra no ta mira cu tin problema mental. Psicologo ta haya cu R.N. tabata experimenta cu droga. Reclasering ta haya cu e chens tey cu R.N. por bolbe haci algo asina. R.N. a bisa Hues cu awor e ta aleha di tur e amistadnan ey y ta bay traha duro pa drecha su bida.

EXIGENCIA DI FISCAL

Fiscal a bisa cu 18 Augustus 2018 a tira den Ranchostraat y a herida Sky. E victima a core bay riba su bicicleta. Dia 20 Augustus 2018, Ski a muri ariba acera banda di The Paddock. Na opinion di Fiscal, tin problema entre gang di Rancho y Sero Patrishi. E amigo di e muher K. tin amistad cu gang di Sero Patrishi y door di Pompelonchi di gang di Rancho a tira riba auto den cual K. tabata, a dicidi di bay tira riba e gang di Rancho caminda Pompelonchi tabata para. Na opinion di Fiscal, tur den auto, hasta R.N. a bisa Q. pa tira. Tur tabata sa cu tabatin un arma di candela den e auto y cu e arma tabatin 3 bala.

Fiscal ta haya cu ta hunto nan a traha e plan y hunto a bay Rancho pa tira. Pesey ta haya cu R.N. ta complice di e morto di Ski y a purba mata e otro 3 personanan para. Tambe Fiscal ta haya R.N. culpable di posesion di arma di candela.

Fiscal a bisa Hues cu e yiu di Ski a keda geshock cu a tira su tata mata. Nunca lo bay recupera di esaki. Fiscal ta haya cu casonan asina ta crea inseguridad. Fiscal a bisa cu e no kier pa tin tiramento riba caminda publico. Esaki por afecta nos turismo. El a bisa cu e ta exigi mescos cu el a exigi pa e muher Q. El a exigi 14 aña di prison.

ABOGADO

Mr. Illes ta haya cu cada caso mester wordo evalua riba su mes. No mester bay usa otronan den e caso aki. El a mustra cu e rol di R.N. ta otro cu esnan den e auto. R.N. no tabata hunto cu e grupo ora nan a tuma e decision pa bay tira. Ta mas laat el a dicidi di sali y a topa cu e grupo. E no tabata sa mes cu a tira riba e muher K. E 4 personanan a subi den auto cun’e y nan tabata trip rond. Nan tabata pa bay San Nicolas pero a pasa den Rancho promer.

Na dado momento nan a bisa pa bolbe pasa atrobe. R.N. no tin problema cu gang di Rancho. E no ta den gang. E abogado a bisa cu R.N. tabata anda cu mal amistad. E no tabata sa nada di plan y no sa mes cu lo bay tira. E no ta haya cu R.N. ta complice. E abogado ta haya cu R.N. mester wordo declara mescos cu e homber W. cu a wordo declara liber y no ta mira pakico ta bay exigi castigo di 14 aña di prison..

Mr. Illes a mustra cu riba e sentencia di W., caminda Hues ta mustra cu e hecho cu W. tabata den e auto no ta haci cu e ta complice. W. tabata sinta dilanti banda di R.N. E abogado a mustra cu tin diferente den e auto a bisa cu R.N. no tabata sa di nada. Despues algun a menciona su nomber. El a bisa Hues pa declara R.N. liber.

- Advertisement -

DUNA COMENTARIO

Please enter your comment!
Please enter your name here