Home Hudicial Castigo pa tur tres acusado di malversacion di Tetra-radio di Polis

Castigo pa tur tres acusado di malversacion di Tetra-radio di Polis

596
0
SHARE
- Advertisement -

Hues ta haya tur culpable y castigabel

ORANJESTAD (AAN): Dialuna mainta Hues a dicta sentencia den e caso penal cu Ministerio Publico a cuminsa contra Nelson Cabral de Andrade, Marko Espinoza Cangahuala, Kenneth Rasmijn.

Algun siman pasa tratamento di e caso a tuma lugar caminda Fiscal a bisa cu Rasmijn entre December 2015 y 1 November 2018, a malversa un Tetra-radio di Polis. Fiscal ta acusa Nelson y Marko cu entre 1 Januari 2015 y 1 November 2018, ta complice di malversacion di Tetra-radio di Polis. Ademas tambe un radio di patruya di Polis.

Dialuna mainta, contrario na dia di tratamento di e caso. E sala tabata practicamente bashi. Nelson no a presenta. Abogado a bisa Hues cu Nelson ta den exterior haciendo trabao.

SENTENCIA:

   Rasmijn: Hues a cuminsa cu Rasmijn y a bisa cu e ta haya legalmente proba cu Rasmijn a malversa un Tetra-radio di Polis. Esaki ta castigabel. Hues a bisa cu como Polis a usa e Tetra-radio aki den cierto medionan di comunicacion pa scucha Polis. Hues ta haya cu Rasmijn a mal usa su posicion di Polis.

Hues a bisa cu un Polis tin un posicion special, caminda e ta un ehempel den comunidad. Mester por confia cu informacion cu Polis ta haya ta secreto y no ta bay den media. Hues ta haya cu Rasmijn a duna un mal imagen na Polis y den comunidad.

Pa cu e castigo, Hues a bisa cu e ta tene cuenta cu Ministerio Publico a bisa cu mando di Polis lo tin intension di kita Rasmijn for di trabao. Hues tambe a tene cuenta cu ta promer biaha cu Rasmijn a cay den man di husticia.

Hues ta haya e castigo exigi pa Fiscal na su lugar y a confirma esaki. El a condena Rasmijn na 240 ora di trabao pa comunidad y si e no cumpli cu esaki e lo mester bay 120 dia di prison. Hues a bisa cu e tempo cu Rasmijn tabata sera lo worde desconta for di e oranan di trabao pa comunidad.

Espinoza: Hues a bisa cu e ta haya legalmente proba cu Espinoza a malversa un Tetra-radio di Polis y un radio di patruya di Polis entre 3 December 2015 y Januari 2018. Tambe Hues ta haya Espinoza culpable di tabata scucha informacionnan di Polis. Hues ta haya cu Espinoza hunto cu Nelson a haci encubrimento di Tetra-radionan di Polis y tabata scucha informacionnan cu no ta destina pa otro persona cu no ta Polis. El a mustra cu Espinoza a percura pa parti tecnico y download App pa asina por a re-transmiti online pa otronan por a scucha tur loke Polis tabata papia riba radio. Hues a mustra cu Polis mester por confia cu informacionnan cu ta papia riba Tetra-radio ta keda secreto.

Pa cu e castigo, Hues a tene cuenta cu Espinoza a yuda cu e investigacion y ta promer biaha cu el a cay den man di husticia. Hues a confirma e exigencia di Fiscal y a condena Espinoza na 180 ora di trabao pa comunidad y si e no haci esaki e lo mester bay 90 dia sera.

Nelson: Hues ta haya legalmente proba cu Nelson a malversa Tetra-radio di Polis y radio di patruya di Polis. E ta haya cu intencionalmente a usa Tetra-radionan cu a worde tuma sin cu tin autorizacion pa esaki. Hues ta haya cu Nelson hunto cu Espinoza tabata scucha informacion cu no ta destina pa otronan cu no ta Polis.

Hues a mustra cu Nelson a duna instruccion na Espinoza pa download programa pa asina por scucha informacionnan di Polis via e Tetra-radionan.

Pa cu e castigo, Hues a tene cuenta cu ta promer biaha cu Nelson ta cay den man di husticia. Hues ta haya cu e castigo exigi pa Fiscal ta na su lugar pasobra esaki ta yuda pa evita cu Nelson ta bolbe haci esaki.

Hues a condena Nelson na 2 luna di prison condicional cu un tempo di prueba di 3 aña. Tambe Hues a condena Nelson na 240 ora di trabao pa comunidad y si e no haci esaki e lo mester bay 120 dia cera.

DIARIO a compronde cu e acusadonan a bisa cu nan lo bay apela e sentencia.

- Advertisement -

DUNA COMENTARIO

Please enter your comment!
Please enter your name here