Presidente di OPPA Ivo Valdez:
ORANJESTAD (AAN) — Den entrevista cu presidente di Organizacion di Pensionadonan Publico di Aruba (OPPA), sr. Ivo Valdez, el a menciona na Merca siman pasa a celebra e Dia di Pensionado, y na Suramerica e lo wordo celebra dia 20 di September, pero su pregunta ta si na Aruba por celebra Dia di Pensionado.
El a expresa esaki, reiterando cu si e consumidor ta bay un supermercado awe y ta bay mañan ya e prijs a subi, pasobra e costo di productonan ta aumenta di un dia pa otro.
E pensionado ta ripara cu cada dia cu pasa, su entrada ta bira menos. Kiermen cu e balor di loke cada persona ta haya tur luna como pension, pa tur e añanan cu el a traha, ta bira menos. E no por cumpra mas loke e kier cumpra sino cu e mester wak kico enberdad e mester cumpra.
Valdez a señala cu enberdad gobierno ta propaganda cu e pensionado ta haya un compensacion. Pero si wak realmente, e compensacion ta bay manera salo den awa, pa motibo cu e costo di bida na Aruba ta haltisimo y no tin espacio mas pa nan paga impuesto, y tur dia e pensionado ta haya sorpresa.
Ivo Valdez a mustra riba borchi kico realmente e 4% cu e pensionado ta haya di rebaho riba su prima di AZV ta nifica.
E persona cu ta haya un entrada di 30 mil florin pa aña ta paga na prima 6.5% cu ta 162.50 florin pa luna. Si e suma ta mas halto, por ehemplo 42.000 florin pa aña (3.500 fls pa luna), e ta paga na prima pa luna 267,50 fls. Pa luna. No obstante un parlamentario cu un entrada di 12 mil florin pa luna, ta paga apenas 1.6% cu ta dune 1.360 florin pa aña of 133 florin pa luna.
Ivo Valdez a haci e pregunta, papiando di compensacion: “E compensacion ey ta husto pa nos cu a traha asina tanto aña, pa e pueblo aki?”
Esaki ta e motibo pakico OPPA ta trece e tipo di temanan aki dilanti, Valdez ta señala, pasobra nos representantenan di pueblo a esnan cu mester lucha pa e pensionado, verdaderamente den e ultimo fase di su bida por biba un bida trankil y feliz hunto su hendenan, y no cu cada bez cu e pensamento “con mi ta haci mañan pa come y bebe, etc?”
Valdez a subraya cu hopi hende ta pensa cu OPPA su pensionadonan ta esnan elite, pasobra nan tin dos pension, pasobra nan ta di sector publico. No obstante, Valdez a subraya, tin miembronan di OPPA cu no ta gana ni 2500 florin pa luna di ambos pension hunto.
Imagina esnan cu ta haya un solo pension. “Mi ta loco pa sa con nan ta haci cu nan cen den henter un luna”?
Valdez a splica cu e pension no ta conoce un ahustacion desde 2013 mientras cu e costo di bida ta sigui subi. “Ahustacion ta depende plenamente di e rendimento di e fondo di pension of si e AOV cu SVb ta duna, subi”, el a splica. Mientras tanto e signature di gobierno ta cambia y e pensionado ketobay ta keda warda riba un ahustacion cu pa añanan caba, nan tin derecho riba dje.
Aworaki tin un caso ta andando cual ta bayendo por escrito y te ainda OPPA no por keda cla cune. Valdez a comenta cu no por ta asina cu e costo di bida ta subi anto ahustacion di e pension ta depende di e rendimento di e fondo. E ta haya cu no ta husto.
“Nos tambe ta hende. Nos a contribui cu e comunidad aki; nos tin un derecho pa ley y pa ley humano, di tin un bida trankil y esey ta tin un entrada cu nos por biba di dje”, Ivo Valdez a subraya.
