Lucha pa sobrevivencia financiero Citgo tambe ta continua
*Financiadonan di Citgo cu preocupacion pa nan inversion
*Posicion Citgo den crisis Venezolano ta mas pronuncia
ORANJESTAD(AAN)- E advertencia di DIARIO na 2018 cu Aruba lo ta parti di un crisis internacional, ta resulta berdad den e situacion cu ta escala na Merca y ta crea cada rato mas incertidumbre rond Citgo.
Despues cu e grupo di Nicolas Maduro a pidi Hues na Merca pa no permiti pa e personanan cu Guaidó a nombra dicidi pa Citgo, awor ta Guaidó cu na su turno a pidi durante tratamento di e caso aki pa Hues oficialisa su derecho di ta dicidi pa Citgo.
Juan Guaidó a pidi Hues pa duna respaldo na e grupo di persona cu el a nombra pa dirigi Citgo despues cu el a asumi presidencia interino di Venezuela a base di areglonan constitucional di e pais.
Manera DIARIO a trece dilanti algun siman pasa, e grupo di Nicolas Maduro a pidi Hues na Delaware, Merca, pa no permiti e gerencia cu Guaidó a nombra pa tuma decisionnan pa Citgo.
E peticion aki ta bay contra hurisprudencia na Merca, caminda den Corte den pasado a tene na e principio cu e Presidente Mericano ta dicidi kende ta e representante oficial di un pais na Merca.
Den e caso aki Merca ta uno di e paisnan cu a reconoce Juan Guaidó como e dirigente di Venezuela y e grupo Maduro segun defensornan di Guaidó no por pidi Hues pa deshaci di e nombramento di gerencia dor di Guaidó.
Pa Nicolas Maduro perdida di Citgo ta nifica cu e no por sigui saca placa for di su fuente grandi di entrada cu el a hipoteca pa haya placa cu awor ta bou investigacion pero tambe cu a yuda pa e por a haci prestamonan manera na Rusia.
Pa Guaidó ta importante pa e asunto wordo regla debi na e hecho cu ya su grupo a paga 71 Miyon Dollar na interes na e grupo financiado di e bononan 2020, cu awor ta spera pago periodico y pago di interes prome cu fin di October. Pa por haci e pago aki lo mester di casi un Biyon y e grupo Guaidó ta en busca di refinanciamento debi na e falta di fondo di e compania.
Tanto e balor di Citgo como e posibilidad pa scapa e compania ta depende di siguransa huridico cu mester sostene e compania cu ta un di e nucleonan di e problema na Venezuela, caminda PDVSA a perde e posicion importante cu e tabata tin mundialmente.
Mientrastanto e caso Crystallex tambe ta pendiente mescos cu e caso entrega dor di un ex empleado di Citgo cu a divulga crimennan cu a wordo cometi dor di e grupo di Nelson Martinez y otro sostenedonan di e grupo Nicolas Maduro.
