Home General Curaçao y posibel tercer intervencion Hulandes for di su Status Aparte

Curaçao y posibel tercer intervencion Hulandes for di su Status Aparte

78
0
SHARE
- Advertisement -

Na 2017 pueblo di Curaçao a pidi intervencion di Hulanda

Na 2012 tabata presupuesto y na 2017 pa rescata democracia

ORANJESTAD(AAN)–Menos cu un decada despues di e momento cu Curaçao a bira un pais autonomo den Reino Hulandes, e ta enfrenta awe e posibilidad di otro intervencion, instruccion, di parti di Hulanda.

Dia 10 di October 2010 Curaçao a haya su Status Aparte. Tabata Gerrit Schotte cu a bira e Prome Ministro di e pais, cu a drenta un periodo politico turbulento.

Na 2012, e prome instruccion di parti di Hulanda a exigi gobierno di Curaçao pa cambia su presupuesto.

Problemanan politico a surgi na e pais cu na 2013 a conoce e consternacion causa pa e asesinato di Helmin Wiels cu ainda mester haya su conclusion den Corte di Husticia.

Gobiernonan a sigui otro den tempo cortico mientras e situacion na Venezuela a causa problema economico. E refineria di Curaçao, despues di salida di Shell, a keda den man di PDVSA cu na 2016 a wordo informa cu lo no prolonga e acuerdo na 2019.

Na final di 2016 Ministro Presidente Ben Whiteman di e Partido Pueblo Soberano di Wiels, corto tempo prome cu eleccion a anuncia un acuerdo cu un grupo Chines pa operacion di e refineria.

A pesar di e promesa di yegada di e grupo Chines, e partido di Whiteman a perde eleccion y tabata e partido MAN, guia pa Hensley Koeiman cu a gana eleccion y a forma un gobierno cu no tabata tin bida mucho largo.

Accion dirigi pa Gerrit Schotte, a cambia e resultado di eleccion den Parlamento di Curaçao.  Den e tempo ya Gerrit Schotte tabata bou investigacion di Husticia pa actonan di corupcion mescos cu su Ministro di Financia, Jorge Jamaloodin cu awe ta den prizon pa corupcion pero tambe pa acusacion di ta e autor intelectual di asesinato di Wiels.

Corto tempo despues di formacion di Gabinete Koeiman, Schotte a convence algun miembro di e partidonan di coalicion pa tumba Gabinete Koeiman y asina a forma un gobierno nobo.

Koeiman a logra disolve Parlamento y a yama eleccion nobo mientras otro gobierno a sinta.

Ni Schotte ni otro miembronan prominente di su partido, ni Charles Cooper a pasa e screening necesario pa por a bira Ministro y finalmente tabata Pisas cu a dirigi e gabinete nobo, cu a dicidi di stop eleccion nobo te ora Gabinete Pisas dicidi cu por tin eleccion.

Pueblo di Curaçao a drenta den accion y a pidi intervencion di Hulanda, cu a duna instruccion na Gobernador di Curaçao  pa supervisa eleccionnan cu tabata planea.

Den e tempo cortico cu e gobierno Pisas a sinta, sumanan enorme a wordo gasta y Curaçao a drenta un periodo sumamente dificil.

Acopla na e situacion regional cu a afecta economia di e pais, e problemanan interno a causa impacto serio riba e situacion financiero, cu e gobierno nobo dirigi pa Eugene Rhuggenaath a enfrenta.

Awe Hulanda lo dicidi kico lo pasa y si ta bini instruccion den maneho financiero di Curaçao.

Na Curaçao e opinion riba supervision Hulandes ta dividi. Mas ainda despues di e sucesonan na 2017 cu pueblo mes a pidi Hulanda interveni como e hecho cu Curaçao kier solucion despues di hopi turbulencia.

Ministro Presidente Rhuggenaath a anuncia ayera cu el a yega na un compromiso cu Hulanda pa un pakete pa yuda Curaçao sali dilanti.

El a anuncia tambe cu awe un decision riba intervencion Hulandes lo wordo tuma den un situacion caminda pueblo di Curaçao ta exigi saneamento di politica.

- Advertisement -

DUNA COMENTARIO

Please enter your comment!
Please enter your name here