Home General E realidad di clase medio na Aruba

E realidad di clase medio na Aruba

166
0
SHARE
- Advertisement -

Analisis

Kico ta gordo y flaco? Kico ta grandi y chikito? Kico ta dushi y fastioso? Cada comunidad tin su midi di acuerdo cu su forma di bida, su cultura y loke e ta considera normal.

Tin cierto realidad cu ta bira fastioso pa personanan cu ta cumpra articulonan online y ta cumpra blusa size “large” na China pa ricibi un articulo cu ta pa mucha na Aruba.  Un experencia fastioso, cu por wordo evita den futuro.

Problema ta bira, ora un pais ta uza clasificacion pa loke no ta.

Clase medio ta un expresion cu na un forma special ta wordo uza den politica pa atende cu e parti mas grandi di pueblo. Politiconan tin e tendencia di yama tur cu tin un auto, un cas di dos camber, y ta dal dos betro pa siman, clase medio.

Personanan cu ta biba den un cas poco mas grandi ta wordo yama rico. Un habitante di un cas chikito, kende ta uza transportacion publico ta pober.

Cifranan mester papia e berdad y berdad ta cu Aruba semper tabata conoce poco hende realmente rico, hopi hende cu mester traha duro pa nan placa y un grupo mas chikito cu ta pober. Ta bon cu Aruba tin su Oficina di Estadistica cu ta saca nos for di tur apuro pa nos por analisa e ponencia di antes.

Cifranan di 2016, ta duna e ponencia aki rason. Si analisa cifranan di 2016, ta mira cu ta un grupo di 31 porciento di famianan na Aruba tabata tin un entrada di mas cu 7116 florin pa luna y solamente 11.9 porciento tabata tin un entrada di 8.896 florin pa luna of mas.

Mas leu e cifranan no ta bay. Si nos mira e loke mundialmente ta wordo considera como rico, nos no por bisa cu na Aruba tin hopi rico.

No! Mas bien por bisa cu na Aruba tin un grupo chikito di hende rico y cu e gran mayoria di Arubiano ta hende cu mester traha pa nan biba. Si nan no traha y nan no uza nan cabes, nan ta den problema serio.

Ora papia di balor di placa na Aruba, por mira cu mester di mas Florin cu antes pa come y biba. Pero na mes momento ta gana mucho mas cu antes.

E spiraal di inflacion a saca e pais for di normalidad. Entrada a subi, prijs a subi, entrada a bolbe subi y prijs a sigui subi.

Esaki a nifica cu inflacion a pone cu e cifranan cu nos tabata uza pa pober, clase medio y rico a cambia.

Si antes un Miyonario tabata algo cu nos tur kier a bira den soño,  awe nos tur kier bira Biyonario. Placa a perde su balor y nos tur a yuda placa perde su balor cu velocidad di jet.

Pero e placa cu nos tin no a haci nos mas rico, cu ta nifica cu nos por biba un bida mas comodo.

Cincuenta aña pasa, hende por a biba cu Cien Florin. Awe Cien florin no tin ningun balor. Cifranan ta mustra cu 20 porciento di nos famianan na 2016, tabata tin un entrada di menos cu 1.117 florin. Pues esun cu nos ta pone den e grupo di entrada mas abou na 2019, ta haya dies bes mas tanto pa luna cu trahadonan cincuenta aña pasa.

E clase medio di Aruba ta conta cu un entrada familiar di entre 1.179 florin pa 7.116 pa luna. Pues aki nos ta haya e clase medio abou, menos abou, mas ariba, na top di ariba.

Di kico nos ta papiando? No ta bira tempo pa nos enfrenta berdad? No ta bira tempo pa nos mira nos problemanan na forma concreto y stop di hunga cu clasificacion politico manera “clase medio”?

E problema mas grandi cu Aruba conoce ta politikeria. E ta stroba Aruba di mira berdad. E ta instiga gruponan di comunidad y ta stroba nos di mira con nos mes ta hinca nos curpa den problema mientras ta hunga cu palabra.

DIARIO sigur lo duna un man pa Aruba recupera. Nos lo mustra Aruba e berdad pa asina nos Status Aparte haya contenido real. Ta esaki tabata e motibo di DIARIO. Informa Aruba pa Arubianonan por traha conscientemente riba nan awe y mañan.

 

 

 

- Advertisement -

DUNA COMENTARIO

Please enter your comment!
Please enter your name here