El a bin Aruba recien pa snorkel
ORANJESTAD (AAN): Informacion di Panama ta indica cu e autor destaca Rosa María Britton, kende na hopi ocasion a ricibi honor cu Premio Nacional de Literatura Ricardo Miró, a fayece Diamars cu 83 aña di edad na Ciudad di Panama, debi na cancer na su vlies di pecho y problema di hala rosea, segun un fuente a laga sa.
E novelista y profesional di medicina cu specializacion den obstetricia y oncologia, tabata hospitaliza pa mas di un luna, pero el a pidi Docternan pa lage descansa na cas, unda el a fayece Diamars merdia.
Presidente di Panama tambe a tuma nota di e fayecimento di e autor premia aki, y a alaba su dedicacion pa educacion y medicina.
Conseho di Ministro tambe a observa un minuut di silencio pa fayecimento di Rosa María Britton, un muher dedica na educacion y medicina na beneficio di pueblo Panameño. Esey ta loke Presidente di Panama a pone riba Twitter.
E autor ta casa cu e ingeniero Mericano, Carl Britton, kende tambe a fayece dos aña pasa. Awor el a bay lagando su yiunan Gabrielle y Walter, kendenan ta biba na Miami.
Conoci pa ta un persona cu semper ta na altura di eventonan nacional na su pais, e autor no ta keda keto ora cu e mester papia di un asunto cu no ta conta cu su aprobacion of ta hacie incomodo.
Aña pasa na Januari, el a hasta confesa cu e ta desapunta cu Husticia Panameño a logra nada cu e escandalo di soborno di Odebrecht, mientras cu otro paisnan mas pober si a logra impone castigo riba coruptonan. El a keha di e fayonan di Husticia na Panama, y cu e no ta funciona.
Rosa María Britton su tata ta di origen Cubano, y su mama ta di Panama. El a skirbi 20 obra, y a gana varios biaha den novela (1982, 1984, 1991), storia (1986), y teatro (1986 y 1987).
E buki “Tocino del Cielo” tabata su ultimo novela. El a wordo publica na 2015 pa Penguin Random House.
El a cuminza studia medicina na Escuela de Medicina na Universidad de La Habana, y despues a finaliza y gradua di Docter en Medicina y Cirugia na Universidad de Madrid na Spaña. Di 1961 pa 1966 el a studia Obstetricia y Ginecologia Oncologico na Brooklyn Jewish Medical Center na Merca.
BISHITA NA ARUBA:
Como prueba di su vitalidad, e tabata capaz di celebra ora cu el a cumpli 80 aña di bida, pa bay bao lama y a bucea na Aruba. El a haci esey cu un snorkel y tambe zwemvin na su pianan.
“Mi a bisa mi yiu muher, cu esaki lo ta mi ultimo cumpleaño ta scuba dive na Aruba, pasobra mi a sinti cu mi mester a haci algo extremo asina,” ta loke Rosa María Britton a yega di declara dos aña despues di a haci e hazaña ey na e isla aki.
