Corte a ratifica union special Citgo, PDVSA y Gobierno Venezuela
*Advertencia DIARIO pa buelta grandi Citgo a bira realidad
*Ni borg por stroba Crystallex di ricibi 1.4 Miyon y interes
ORANJESTAD(AAN)–Ta existi e pensamento cu mester mira un compania di estado los for di un gobierno. Den cierto caso esaki no ta berdad. Hurisprudencia di dos compania den Corte na Merca a pone cu Corte den Apelacion na Delaware, Merca, a dicidi cu e compania minero Canades, Crystallex por ricibi accionnan den Citgo.
Kico esaki lo nifica den un situacion cu tanto Rusia como e financiadonan 20/20 tin e total di accionnan den Citgo, no ta conoci.
Den un veredicto di 45 pagina, Corte a rechasa e apelacion di Venezuela contra e veredicto di Hues na 2018.
E caso aki tabata uno di e situacionnan mas importante cu DIARIO a presenta na Aruba pa mustra riba e peligernan grandi cu e proyecto rehabilitacion refineria di Aruba tabata contene.
Crystallex ta uno di e companianan cu a wordo perhudica dor di e nacionalisacion di economia Venezolano dor di Chavismo.
Mescos cu cantidad di otro compania, el a trata di tur forma pa recupera e perdida cu el a sufri. El a dicidi di pidi Corte permiso pa e pone beslag riba Citgo como propiedad Venezolano.
Den un caso unico, Hues na Merca a mustra cu tin tur prueba cu regimen Maduro y asina PDVSA tabata uno cu Citgo y PDV Holding. E hecho cu Maduro por a haci y deshaci manera e tabata kier den Citgo, a haci cu a duna Crystallex rason y el a haya derecho pa tuma 1.6 Biyon aproximadamente como accion den Citgo.
E suma ta representa e placa cu el a exigi di Venezuela cu interes.
Manera DIARIO a relata na December 2018, e hecho cu regimen Maduro no a sigui cumpli cabalmente cu e pagonan na Crystallex, e compania a duna orden na su abogadonan pa cuminsa cu e benta di e accionnan cu Crystallex tin derecho ariba y cu ta mes tanto placa cu e accionnan di e grupo di financiadonan 2020.
Crystallex a cuminsa cu e benta ora regimen Maduro a dicidi di apela e decision di Hues na fabor di Crystallex.
Ora Juan Guaidó a asumi presidencia di Venezuela el a nombra e gerencia nobo di Citgo y a pidi Hues un oportunidad pa e yega na un acuerdo cu Crystallex.
Te awe no tabata tin cambio pa loke ta trata e situacion concreto na Venezuela, caminda ainda ta Nicolas Maduro ta haci y deshaci cu PDVSA manera e kier na Venezuela.
Den Corte na Merca esaki a bini dilanti tambe den e veredicto di Corte, cu a indica cu a scucha Guaidó pero cu ni Maduro ni Guaidó por evita cu Crystallex por haya e accionnan den Citgo a cambio di e placa cu Venezuela debe.
Hues a mustra tambe cu e no por tene cuenta cu e interes di e financiadonan 2020 y cu Crystallex tin derecho riba 1.4 Biyon plus interes na accion den Citgo.
DIARIO lo sigui amplia riba e desaroyo sumamente importante pa Aruba.
