“Un agenda politico di AVP”
ORANJESTAD (AAN) — Minister di Enseñanza, Ciencia y Desaroyo di Medio Ambiente, a referi na e demanda di SEPPA, durante un manifestacion cu a tuma lugar Diaranzon atardi, den cual e gremio di maestronan tabata envolvi.
E demanda aki tabata pa pidi e retiro di su persona como Minister di Enseñanza. E dignatario a expresa lo siguiente: “Esaki tin nada di haber cu e persona y e minister di enseñanza. ‘Enseñanza bao di atake’ manera e slogan ta bisa, e mester ta ‘Gabinete Wever-Croes’ bao di atake.
Y respecto na loke ta minister di RED cu un asiento den e gobierno aki ta motibo pa cual el a haya e atake. E no tin di haber cu mi persona y mi lo splica pakico”, Minister Lampe a expresa.
E dignatario a declara: “Nos a haya informacion fidedigno cu na momento cu RED cu un asiento, a haya un ministerio den e Gobierno aki, den Cas di Partido AVP a tuma lugar reunionnan unda nan a analiza y discuti cu si bo kier baha e Gabinete Wever Croes, bo tin cu ataca e Minister di RED, cu tin un asiento so; pasobra RED ta un partido controversial, e ta esun di mas vulnerable, y ora bo bashe abao bo ta basha abao e Gabinete Wevr-Croes, anto a bira instrumental, e presidente di SEPPA, den e estrategia aki”.
Minister Lampe a agrega cu pesey asina cu el a bira minister cu e independizacion di scolnan publico mesora a bin protesta. El a bisa cu e presidente di SEPPA a malinforma e comunidad di enseñanza cu nan ta bay perde nan posicion legal, siendo cu SEPPA mes tabata den e comision di independizacion di departamentonan di gobierno, y nan ta participando den e desaroyo aki.
“Pero asina bin cu minister di RED, cu tin un asiento den gobierno ‘ban critica independizacion’. Di otro departamentonan si, no ta problema” segun e mandatario.
El a remarca cu kico minister di enseñanza bin cune, tin protesta mesora. “Kiermen, claramente e tin un meta politico. Diaranzon tur hende por a mira esaki.
“No tin algo mas politico cu esey! Y, ayera organizadornan di e protesta, tabata reuni cu personanan prominente di e Partido Berde. Kiermen, e ta algo cu tur hende aworaki a realiza. Cu esaki no tin di haber cu minister di enseñanza ni cu enseñanza mes. E tin di haber cu baha Gabinete Wever-Croes via e manera aki”, Minister Rudy Lampe a enfatiza.
E dignatario a expresa cu tin un minister cu ta scucha ta e minister di enseñanza. “Mi no ta impone nada, al contrario mi a bin cu ideanan y nos a yega na un solucion pa Traimerdia. Nos a yega na un solucion pa SPO: den dialogo! Nos a yega na un solucion pa VWO San Nicolas, den dialogo! Y aki rato e mesun presidente di SEPPA a pidi mi pa sinta cune atrobe, y mi a acepta. Awe pa 11’or na mesa nos ta sinta pa dialoga. Anto bisa cu mi ta un minister cu no ta scucha y ta impone, no ta clop cu e hechonan”, e mandatario a reitera.
E dignatario a señala cu e situacion aki ta bay sigui pasobra nan meta no ta enseñanza ni nos muchanan, tampoco e maestronan. Nan unico meta ta tumba Gabinete Wever-Croes.
“Y mi ta sigura boso cu esaki ta bay sigui pasobra ni mas cu kico minister bin cune, nan ta bay keda insisti pasobra nan meta no ta minister di enseñanza, nan meta ta Prome Minister Evelyn Wever-Croes!” Minister Lampe a enfatiza.
Minister ta haya cu esaki ta jammer, ora un presidente di un sindicato ta asumi metanan politico. “Ora cu a hisa e pension di e maestronan, cu a afecta nan interes directamente, e Presidente di SEPPA no a protesta. Al contrario, el a bay di acuerdo, contra interes di e maestronan.
Ora cu un minister a wordo sentencia pa corupcion cu tin di haber cu placa di pueblo, y placa di pueblo ta paga e salario di funcionarionan publico cu ta miembro di e sindicato SEPPA, no a pidi renuncia di e minister.
Aworaki, un minister cu no a horta nan ta pidi su renuncia, pasobra e meta no ta e minister ey, nan kier basha abao Gabinete Wever Croes, y mi ta kere cu na haltura di aworaki tur hende a ripara cu ta un agenda politico tin tras di e slogan ‘Enseñanza bao di atake’. Eigenlijk e ta ‘Gabinete Wever Croes bao di atake”, Minister Rudy Lampe a conclui.
