Na 2014 Aruba mester a economisa den crisis severo

    409
    0
    SHARE
    - Advertisement -

    Investigacionnan exclusivo di DIARIO ta entrega prueba

    *Si a tuma medida na 2014 Aruba lo a recupera na 2018

    *Citgo a bari belastingnan nobo y reduccion gasto for di mesa 

    ORANJESTAD (AAN) — E introduccion di proyecto rehabilitacion refineria, tabata e contesta cu Gabinete Mike Eman a duna na un situacion sumamente alarmante cu a presenta na 2014. Alarma grandi a wordo bati pa e situacion financiero di Aruba.

    Investigacionnan exclusivo di DIARIO ta indica cu gobierno Mike Eman a ricibi conseho pa diversifica economia pero na mes momento introduci un plan pa baha gasto. E plan aki mester a encera baha gasto di personal pa medio di un cantidad di medida. Si Gabinete Eman a actua a base di e conseho, na 2018 Aruba lo por a cuminsa sinti e efectonan di recuperacion.

    E rapport di Conseho Social Economico di Aruba ta papia un idioma cla. E ta referi na e situacion cu Aruba tabata aden na 2014 manera a wordo constata dor di diferente organo independiente, manera IMF.

    Den e rapport ta bini dilanti cu si Aruba kier a bandona e zona di peliger serio cu e pais tabata aden, e mester a tuma un cantidad di medida. Si Aruba a tuma e pasonan cu a wordo recomenda, na 2018 Aruba lo a cuminsa conoce un recuperacion aunke a adverti pa temponan pisa cu tabata spera e pais.

    Segun e Conseho Social Economico, den cual tur gremio ta representa, na prome luga Gobierno mester a cuminsa establece kico ta e tarea di gobierno den comunidad.
    A base di esaki, mester a percura pa bini miho funcionamento di gobierno. “Economisa” tabata e mandato directo cu gobierno a ricibi y baha gastonan di e aparato gubernamental tabata uno di e consehonan importante.

    Den e rapport a trata di aporta na un solucion pa gobierno baha su gastonan entre cual gastonan di personal di gobierno.

    E situacion di Aruba na 2014 tabata alarmante den e sentido cu ya na 2013 e debe nacional a alcansa 71.2 porciento di e Producto Bruto Nacional, loke a nifica cu Aruba ya a surpasa e norma Europeo cu 11.2 porciento.

    E gastonan di gobierno tabata surpasa entradanan den presupuesto cu 8.5 porciento di e Produccion Bruto Nacional.

    E preocupacion pa e situacion financiero di Aruba a wordo comparti cu IMF, cu tabata pues di opinion cu un recuperacion na 2018 tabata posibel si a tuma medida.

    Tabata adverti pa sorpresa negativo pero tambe pa crea un reserva den e temponan dificil cu e pais tabata conoce.

    Den e rapport ta bini bon cla dilanti cu e placa cu gobierno tin na su disposicion ta di pueblo y cu nunca gobierno tabata tin placa di su mes.

    Mas responsabilidad gobierno pone riba su lomba, mas gasto e mester cubri cu fondonan di pueblo.

    Conseho Social Economico a mira e solucion den creacion di un balansa den e gastonan y entradanan di gobierno.

    E personal di gobierno mester ta basa riba e tareanan cu e mester presta y si baha e cantidad di tarea cu gobierno ta tuma na su encargo, por baha e gastonan di personal.

    Na 2008 a realisa un analisis di tarea pero no a sigui traha riba e resultadonan.

    Diferente tipo nobo di belasting a wordo menciona pa por aumenta entrada di gobierno, cu na mes momento mester a reduci su gastonan.

    Aki por pensa riba posibilidad pa encarga otro instancia cu e trabounan cu ta wordo haci dor di departamentonan di gobierno.

    Gobierno mester a introduci central di compra y tambe bini deshaci di gastonan manera di auto.

    E Landsverordening Materieel Ambtenarenrecht, den cual derechonan di personal ta hancra y cu DIARIO  a yega di presenta na lectornan,  mester wordo revisa segun e rapport cu ta scrap tur gasto innecesario di personal.

    Economisa pues tabata e mandato cu gobierno Eman a ricibi na 2014 di Conseho Social Economico.

    Ta despues di e rapport aki ta tuma nota, cu Citgo ta aparece riba escenario. Ora Citgo wordo introduci como e salbacion di Aruba cu lo pone economia crece cu 15 porciento, tur  e medidanan cu a wordo menciona den e rapport di 2014, aparentemente a wordo bari for di mesa.

    Na 2018 Citgo no a habri su portanan pero tampoco Aruba por a disfruta di un recuperacion pasobra e medidanan cu mester a wordo introduci na 2014 no a wordo tuma y na 2018 e bom a explota den man di un gobierno nobo, cu hunto cu e fracaso di Citgo, mester a tuma medidanan pisa.

    DIARIO lo sigui traha riba tur informacion necesario pa Aruba, cu mester a wordo prepara for di 2014 pa cambia su rumbo.

    - Advertisement -

    DUNA COMENTARIO

    Please enter your comment!
    Please enter your name here