PAHO ta urgi islanan den Caribe pa prepara pa ola di calor

    317
    0
    SHARE
    - Advertisement -

    ORANJESTAD (AAN): Un boletin cu DIARIO a ricibi Diabierna directamente for di Pan American Health Organization (PAHO) for di Washington, DC, ta indica cu en bista di e actual olanan di calor na Europa y e pronosticonan cu e fenomeno aki lo bay afecta tambe varios parti di continente Americano, e ora PAHO y tambe World Health Organization (WHO) ta urgi paisnan den e region aki pa ta prepara, debi na e impacto cu esaki por tin riba salud di hendenan, incluyendo e riesgo di morto.

    Durante e verano di hemisferio sur di 2018-2019, siete pais den continente Americano (Argentina, Brasil, Chile, Mexico, Paraguay, Peru, y Uruguay) a wordo afecta pa olanan di calor, un fenomeno nunca antes bisto den e region.  E olanan di calor cu tabatin e impactonan mas grandi desde 2000 tabata esnan na Brasil na 2010 cu a causa morto di 737 persona, y uno na Argentina den verano di 2013-2014 cu a causa 1.877 morto, y a laga 800.000 hende sin coriente, cu a aumenta stress di calor den e poblacion.  Segun autoridadnan di salud na Merca, olanan di calor ta e fenomeno natural cu ta causa mas morto na e pais ey.

    Pronostico di tempo valido pa Norte America, Centro America, y Caribe ta pronostica olanan di calor durante verano di 2019.  Esaki por causa stress provoca pa secura, cu por conduci na candelanan di mondi, y tin efecto dañino riba salud humano.

       PLANNAN DI EMERGENCIA:

    Debi na e situacion, PAHO a desaroya un guia pa yuda paisnan den region, formula plannan di emergencia pa atende olanan di calor.  E guia ta na:  http://bit.ly/hopicalor
    E guia aki ta suministra recomendacion cu sector di salud y agencianan di meteorologia por implementa pa prepara y responde mihor na e menaza aki, promove salud, preveni e efectonan severo di olanan di calor, trata hendenan afecta, y salba bida.

    E documento ta enfatiza cu plannan di contingencia pa olanan di calor mester por determina e alcance di e menaza, cu procedimentonan pa activa alerta, un descripcion di rol y funcionnan, y mecanismonan cu agencianan di gobierno por usa pa coordina.

    E documento ta subraya cu paisnan mester reforza e vigilancia epidemiologico di morbilidad y mortalidad relaciona cu calor, e capacidad di servicionan di salud (capacitacion di personal, mehora e diseño di Hospitalnan nobo, y equipa di Hospitalnan existente den areanan di riesgo halto), y mehora e accionnan cu autoridadnan local ta tuma, tambe prensa, y comunidad den termino di medidanan di reaccion di Departamentonan di Gobierno, medidanan di prevencion, y cuido propio.

       Impacto di Olanan di Calor riba Salud:

    E exposicion na calor na causa sintomanan severo manera cansancio di calor of heatstroke (un condicion cu ta pone hende bay for di tino, como tambe cuero seco y cayente, debi na e inabilidad di e curpa pa controla temperaturanan halto).  Mayoria di e mortonan relaciona cu calor ta debi na empeoramento di condicion cardiopulmonar, di riñon, endocrina, y psiquiatrico.  Otro sintomanan ta inclui edema den organonan mas abao, rash di calor riba bo nek, calambre, dolor di cabez, iritabilidad, letargo, y debilidad.

    E hendenan cu malesanan cronico cu ta tuma remedi tu dia, tin un riesgo mas grandi pa haya complicacion y morto durante un Ola di Calor, mescos cu hendenan di edad mas grandi y muchanan.

    E reaccionnan pa calor ta depende di e capacidad di cada persona pa adapta y e efectonan grave por aparece diripiente.  Pesey ta importante pa paga tino riba e alerta y recomendacionnan di autoridad local.

    Con pa preveni efectonan di calor:

    (*) Keda atento na alertanan di meteorologia y pronosticonan.  (*) Evita di bay den solo entre 11:00 am y 4:00 pm. (*) No laga mucha of hendenan den autonan staciona.  (*) No haci ehercicio of haci actividadnan intenso pafo sin proteccion adecuado.  (*) Bebe awa cada 2 ora, hasta si acaso bo no tin sed.  (*) Mantene bo cas fresco door di cubri bentananan durante dia y usa airco of fan durante e oranan mas calor.  (*) Si bo tin malesa cronico y ta bebe remedi, consulta cu bo docter.

       Kico pa haci si bo haya sintoma di calor:

    (*) Heatstroke ta un emergencia medico cu ta menaza bida. Bo mester bay Hospital pa ricibi atencion urgente.  (*) Stop tur actividad fisico.  (*) Yama un Ambulans inmediatamente.  (*) Bay of move e persona pa un lugar mas fresco. (*) Usa cualkier forma fisico pa fresca e persona, manera fria e cabez y curpa cu awa y manda aire riba dje pa reduci nan temperatura.

       Señalnan di advertencia den casonan severo:

    (*) Cansancio di calor.  (*) Sudor pisa. (*) Cuero fresco pero bleek.  (*) Temperatura menos di 40º C.  (*) Mareamento of cay flauw.  (*) Dolor di cabez.  (*) Hala rosea liher.  (*) Pulso debil y rapido.  (*) Heat stroke.  (*) Cuero cora, cayente y seco. (*) Temperatura mas halto cu 40º C.  (*) Dolor y batimento di cabez.  (*) Bay for di tino of den coma.  (*) Curazon ta bati rapido y duro.

    - Advertisement -

    DUNA COMENTARIO

    Please enter your comment!
    Please enter your name here