ORANJESTAD(AAN): Acompaña pa ex Consul Peruano Hugo Lampl, kende tabata tin e funcion ey pa mas di 20 aña na Aruba, presidente di Fundacion Fiestas Patrias de Peruanos en Aruba Guillermo Salinas a hiba palabra Diamars atardi, durante un conferencia di prensa relaciona cu e celebracion cu ta bay tuma lugar pa loke ta 198 di independencia di Peru.
Salinas a splica cu e fundacion ta uno ‘non profit’, cu ta representa e comunidad di Peru.
“Dia 28 di Juli ta bay ta 198 aña di independencia di Peru y esaki ta algo historico, mirando cu pa varios siglo nos pueblo tabata bao di un bi-reinado di Spaña bao di Rey Carlos V”.
“Despues di un lucha largo cu un perdida grandi di bida humano y danki na soldatnan di diferente nacionalidad di e paisnan bisiña, nos a logra haya nos independencia riba 28 di Juli 1821”.
“Esaki a wordo dirigi pa Don Jose de San Martin, un general di Republica di Argentina”.
Esaki segun presidente di e fundacion, kende a sigui bisa cu na Aruba tin alrededor di 1800 pa 2000 Peruano.
“Cada un di nos ta un embahador di nos cultura y nos experiencia y como Peruano nos ta invita tur hende pa e celebracion di hisamento di bandera riba 28 di Juli”.
Esaki segun Salinas, kende a sigui bisa cu riba e dia ey ta bay duna reconocimento na diferente persona.
E programa protocolario ta bay ta di 10’or di mainta te cu 12.30 di merdia den Wilhelmina Park.
