Sindicatonan di Empleadonan Publico kier indexering di 3.6% pa compensa inflacion di 2018

    193
    0
    SHARE
    - Advertisement -

    Mientras cu Gobierno kier tempo y espacio

    * Indexering, Bashi Premie y Gelijkbedrag ta keda topico di discusion

    ORANJESTAD (AAN): Tin un grupo di empleadonan publico cu ta bringando hunto pa a traves di sindicato haya nan Indexering.

    Den un rueda di prensa diamars mainta, Eduard Maduro, vocero, a duna di  conoce cu nan kier aclaria kico ta nan posicion den e aparato gubernamental.

    El a indica cu na prome lugar, na 2008 caba tabata tin indexering. Na 2011, 2012, 2013 gobierno a duna indexering. Mientras cu na 2013 tabata e ultimo aña cu a duna indexering.

    Despues a bin un acuerdo bilateral na 2014 unda cu a bin cu algun reglanan y mayoria di sindicatonan a firma e acuerdo aki, a señala.

    Sigur tres aña nan a premira cu no lo bay tin e discusion aki mirando cu no tabata tin un escenario unda ta bay haya inflacion y no por a haci afspraak pa compensacion pa locual ta trata e perdida di poder di compra.

    INFLACION 2018

    Na 2018 a cera e aña cu un inflacion di 3.6%. Na 2019, e sindicatonan a dicidi di sinta hunto pa discuti ariba esaki y pa pidi gobierno pa sinta na mesa y negocia indexering, Maduro a bisa.

    A manda carta pa gobierno y a pidi reunion pa asina e sindicatonan por a trece nan puntonan di salida na mesa. Esaki tabata e prome reunion cu tabata tin cu gobierno dia 8 di April di e aña aki.

    Despues di esey a reuni un cinco biaha mas. 24 di Mei a entrega gobierno un carta unda cu a pone dos punto den e carta. A pidi gobierno pa tuma na cuenta nan punto di salida cual ta 3.6% y tambe a pidi cu pa 30 di Juni cu nan lo kier tin un contesta pa loke ta trata e discusion aki, Eduard Maduro a splica.

    Durante e reunionnan aki gobierno a duna e mesun splicacion, cu nan mester tempo y cu nan no a tuma na cuenta e parti di indexering den presupuesto como tambe pa bin cu un proposicion.

    CARTA A BIN Y CARTA A BAY

    Maduro a sigui bisa cu mirando cu nan no tabata haya nada concreto y tempo tabata pasa e ora a dicidi di manda un carta mas pa gobierno pa asina bisa nan cu e sindicatonan kier un ‘tegenvoorstel’ na locual ta nan puntonan di salida pa asina por cuminza negocia.

    “Lamentablemente den e carta cu gobierno a duna nos ultimo, nos no a haya e tegenvoorstel aki”, a expresa.

    Conseho di Minister den nan ultimo carta cu fecha 26 di Juni a bolbe splica cu nan mester tempo y espacio pa nan por traha ariba un ‘tegenvoorstel’ y pa asina conhuntamente sali for di e discusionnan aki, Eduard Maduro a laga sa. E ora a pidi gobierno pa defini cuanto tempo ta loke nan mester. Den nan carta e tempo ta indefini.

    BOLBE MANDA CARTA

    Esey ta e parti unda e sindicatonan ta actualmente y den nan reunion interno a dicidi cu ta bay bolbe manda un carta pa gobierno pa duna contesta na e carta di dia 26 di juni pa por sali afor for di e tema aki, e vocero di e empleadonan publico a indica.

    El a remarca cu ora tin inflacion por bati na porta di e doño di trabao, den e caso aki gobierno pa pidi nan recompensa e perdida di forza di compra cu a bay perdi debi na inflacion.

    No ta un cuestion cu aworaki nan a dicidi di bin dilanti, a bisa. Nan a sigui e desaroyo di cerca y ta poni den e protocol cu a firma cu gobierno. Pesey kier a evacua tur duda ariba pakico a bin cu e discusion aki, a agrega.

    BASHI PREMIE Y GELIJKBEDRAG

    Relaciona cu e aspectonan aki, Maduro a manifesta cu esnan cu a baha cu pension desde 1 di Januari 2015 no ta recibiendo ‘bashi premie’ y ‘gelijkbedrag’.

    El a bisa cu Prome Minister a indica den un reunion cu gobierno unilateralmente, ‘ad hoc’ a dicidi pa kita esaki for di e pensionadonan sin cu e partidonan envolvi a firma pa elimin’e. E asunto aki ta hinca den e ‘pensioenoverleg’ 2014 unda cu a papia di ‘duurtetoeslag’.

    Ya caba for di 2017 a cuminza cu e discusion aki y ainda ta papiando ariba dje cu gobierno. A indica cu e tema ainda no ta hopi den publicidad manera e tema di indexering. Pero ta un tema cu tin atencion di e sindicato y no lagu’e bay sin mas, Eduard Maduro a finaliza bisando.

    - Advertisement -

    DUNA COMENTARIO

    Please enter your comment!
    Please enter your name here