Home Gobierno Tatanan cu no ta casa pero a reconoce nan yiu pa busca...

Tatanan cu no ta casa pero a reconoce nan yiu pa busca un “ouder gezag”

118
0
SHARE
- Advertisement -

Minister Presidente ta aconseha:

ORANJESTAD (AAN)—Den conferencia di prensa relaciona cu e tema di “Parents Alienation” den cual Minister Presidente hunto cu miembronan di Kids Rights Empowerment, a hiba palabra, e dignatario a elabora tocante e aspecto huridico.

Ora e mucha nace dentro di un matrimonio, e autoridad ta wordo reparti pa ley di forma igual pa e tata y e mama.

Ora un pareha divorcia y nan bay Corte, Huez ta exigi pa nan parti e autoridad entre nan dos (tata y mama) con tal cu no tin peligro pa e mucha.

Pero e asunto cu a trata durante e conferencia di prensa, no ta tocante mayornan cu ta casa of cu a divorcia, ni di casonan cu e mama a haya yiu pero e tata no ta den e bida di e mucha mes.

E mandatario a referi solamente na casonan di pareha cu a haya un yiu sin ta casa y e tata ta y kier ta den bida di e mucha. Den e casonan aki, si e tata a reconoce e mucha y dune su fam, e no tin autoridad cu e mucha.  Den ambos caso e yiunan ta carga e fam di e tata, sinembargo door cu e mucha a nace sin cu e mayornan a casa, e autoridad di mayor ta bay solamente pa e mama.

Ora cu e mucha ta bay vacacion afo cu e mama, Imigracion usualmente ta pidi un carta pero si e mama ta dicidi cu e no ta bin mas y ta keda biba afo cu e mucha, e ora ey e tata ta haya sa cu eigenlijk ni e fam ni e carta tabata suficiente. Nan mester a duna un paso mas fuerte cu ta pidi e ouder gezag (autoridad di mayor).

“Lamentablemente, nos leynan ta asina ainda. Nos ta bay cambie, pasobra e no ta husto cu ora bo reconoce bo yiu y bo ta kere cu bo tin tur derecho riba bo yiu bo no tine. Un tata cu kier reconoce su yiu tin derecho tambe di haya ouder gezag, con tal cu e no ta cay na peligro di e mucha y cu den futuro cos por bay malo. Kita autorizacion na un mayor, esey ta otro materia. Pero e automatismo cu ora bo reconoce bo yiu bo tin ouder gezag nos tin cu pone den nos leynan”, Prome Minister a reitera.

E dignatario a subraya cu e leynan na Aruba ta tarda pa cambia. E ta tuma su tempo, pesey el a bin den conferencia di prensa cu e tema pa splica cu reconoce un yiu no ta un automatismo. No kiermen cu automaticamente, e tata tin autoridad di e mucha.

El a corda cu aña pasa Minister di Husticia a exigi pa tur mayor cu sali cu un yiu busca un carta autentica di e otro mayor, y el a haya hopi critica. Pero scuchando e casonan di e tatanan cu a duna testimonio, e mandatario a subraya cu “preveni ta mihor cu lamenta”.

Minister Presidente a reitera pa e tatanan cu no ta casa pero ta reconoce nan yiu pa busca un “ouder gezag” cu berdad ta costa un poco placa, pero e dolor di wordo separa di un yiu ta costa hopi mas.

- Advertisement -

DUNA COMENTARIO

Please enter your comment!
Please enter your name here