Home General Acuerdo Citgo no tin contesta awe pa Aruba

Acuerdo Citgo no tin contesta awe pa Aruba

276
0
SHARE
- Advertisement -

Raad van Advies a papia palabra cla den su rapport na 2016:

*No tabata tin pronostico di placa cu lo a drenta caha di e pais

*Futuro di Refineria di Aruba, FMSA, Citgo y Aruba desconoci 

ORANJESTAD(AAN)– Kico ta bay pasa cu e refineria di Aruba y kico e pais por spera? E siman ta cera cu trahadonan den expectativa y tratando di haya un siguransa cu ningun hende lo duna nan. Ministro Presidente Evelyn Wever-Croes a lansa e unico indicacion cu por duna Aruba e siman aki.

El a papia di cifranan y loke Citgo realmente a produci pa Aruba. El a papia di cuentanan anual di un proyecto riba cual no por duna contesta. E berdad pa cual instancianan oficial y mundo a spierta for di 2016 awor ta rementa na Aruba. Citgo no tin contesta pa Aruba.

Un di e frasenan mas importante den e rapport cu Raad van Advies a emiti como su conseho den e proyecto Rehabilitacion Refineria di Aruba tabata, cu e acuerdo no ta duna ningun indicacion di placa cu Citgo lo trece den lachi pa Aruba.

Cifranan a wordo menciona dor di miembronan di gobierno di Aruba na 2016, pero e acuerdo no tabata duna garantia di e haltura di entrada real cu Aruba por a spera den e proyecto.

Manera den analisisnan cu DIARIO a presenta a bini dilanti, Aruba a prepara su mes pa e acuerdo cu un formula cu lo a manda placa di un empresa pa otro. Raad van Advies a cuestiona e formula pero tambe a papia di e falta di realidad na cual Aruba por a tene su mes.

Durante e siman cu ta cera, informacionnan a sigui drenta di proyecto Citgo a base di e preocupacion cu sindicatonan a trece dilanti. Un preocupacion cu for di 2018, ora a bira conoci cu e proyecto a tranca, cantidad di  empresa y sindicatonan a trece dilanti tabata con nan futuro lo ta.

E tempo hasta a spera cu cantidad di compania lo a cuminsa caso pa evita cu nan lo a haya nan mes cu problema serio.

Ta conoci cu gobierno Wever-Croes, cu a entrega e acuerdo na Parlamento pa prome bes for di 2016, a trata di haya un contesta di Venezuela. Un delegacion encabesa pa Asdrubal Chavez a bisa cu e proyecto ta sigui y trahadonan a haya un speransa.

Awe ni Asdrubal Chavez ni Nicolas Maduro ni Juan Guaidó conoce nan destino ni por papia pa Citgo. Hasta Rosneft di Rusia y e financiadonan di e prestamo 2020 no conoce futuro desaroyonan debi na e crisis di Venezuela y e hecho cu cualkier rato e compania cu Venezuela debe placa, ta bende Citgo.

E unico solucion cu tin na e momentonan aki pa Citgo ta, cu Citgo ta bandona Aruba pa otro compania drenta pa habri e refineria.

Pero ainda lo mester di varios areglo nobo y ahusta. No ta conoci cuanto tempo lo tuma pa negocia ni kico por wordo negocia.

E resumen di fin di siman ta hancra den un frase, cu ta resultado logico di e advertencia di Raad van Advies na 2016: na e momentonan aki no tin contesta.

Mester bay presenta cifra cuanto placa FMSA ta genera como compania di Refineria di Aruba cu ta compania di Aruba cu tin un refineria cu a tranca. Refineria di Aruba den e situacion actual lo tin dificultad pa pone tur trahado na trabou y awor mester yega na un acuerdo cu Citgo, cu no tin placa y ta na benta practicamente.

Gobierno di Wever-Croes ta busca un contesta pa Citgo, cu a nace sin contesta pa e asuntonan mas importante cu mester tabata parti di e acuerdo.

- Advertisement -

DUNA COMENTARIO

Please enter your comment!
Please enter your name here