Segun Frank Arendsz tin mas ruta na caminda
ORANJESTAD (AAN): Diabierna mainta tabata tin e vuelo inaugural di Aruba Airlines pa Riohacha, Colombia.
Prensa di Aruba a haya oportunidad di bay den e prome vuelo aki acompañando e pasaheronan cu a aborda e vuelo y representantenan di e aerolinea, kendenan a wordo recibi na Riohacha door di prensa y ehecutivonan local.
Frank Arendsz, ehecutivo di e aerolinea na Aruba a expresa cu nan tin hopi expectativa cu e vuelo aki. Nan vuelonan ta sold out pa e proximo dianan, sperando cu e fechanan cu ta bay bin ta bay ta tambe un exito rotundo.
El a bisa cu Riohacha a wordo scogi despues di a haci un estudio. Den añanan anterior, Tiara Air tabata bula e ruta aki pa 5 aña cu hopi exito.
Arendsz a indica cu na Aruba y viceversa tin hopi persona cu tin vinculonan familiar como comercial. Otro aspecto pa cual e hendenan a pidi pa e ruta aki tabata pasobra Riohacha ta un lugar basta barata ora di viaha, cu e posibilidad di haci otro conexionnan via terestre cu metanan comercial of medico.
Arendsz a laga sa cu a bin cu e idea aki for di aña pasa. Tabata tin tres destinacion den plan pa Colombia cu ta Medellin, Barranquilla y Riohacha. A cuminza cu Riohacha pasobra tin e avion (jet) cu por cuminza mesora cune.
Awor ta den spera pa den futuro por haci e vuelo di Barranquilla un realidad cu e mesun tipo di avion. Medellin ta e otro destino den plan, e Accountable Manager di Aruba Airlines a indica.
