Director di Arubus Eddy Mohamed:
ORANJESTAD (AAN) — E Director di Arubus, sr. Eddy Mohamed, den entrevista a señala cu tin falta di sincronizacion entre e plan di mehoracion di caminda cu gobierno ta ehecutando y Arubus.
E ta compronde su, cu e plan di infrastructura aki ta pa mehora e fluho di trafico, cu na e momentonan aki ta dificil. El a comenta cu actualmente Arubus ta pasando e otro banda di caminda, bayendo Noord (e otro banda di caminda) y e compania Arubus ta bezig hunto cu e empresa Motta y DOW pa wak con ta coloca e abrisnan (parada di bus of bushalte) atrobe, cu ta unda e pasaheronan mester para pa subi e bus y bay nan destino.
E instancianan aki hunto cu otro ta bay inventariza tur e abrisnan, unda nan ta situa, si nan ta riba un mihor lugar y riba e camindanan nobo tambe, unda esnan cu tabata existente caba ta.
El a reitera cu e sincronizacion cu Arubus no tabata esun mas optimal, pero awor nan ta mirando pa futuro y ta bay mira con ta bay drecha y pone bushaltenan unda nan mester ta, unda e busnan por para y sea pone esnan cu dak, y unda cu no tin abris pone stand plas pa e pasahero sa cu eynan tin cu para warda nan bus.
Mohamed a indica cu nan tin atencion riba e bario di Pos Chikito y nan ta purbando di traha un plan completo. El a reuni cu e Hefe di e dienst encarga cu e busnan y ta analizando tur e lineanan unda Arubus ta pasa, si tin rutanan cu mester wordo agrega y otronan cu mester baha e frecuencia.
Pa loke ta Pos Chikito e discusion ta pa bay core e ruta paden pa tin e aspectonan di seguridad cu mester tene cuenta cune. E ta conciente di e inseguridad y peligro cu e personanan ta pasa den dje pa por warda bus na Pos Chikito, tanto si mester bay pariba como pabao, y hasta tin cu pasa door di un sero di santo unda ta pone nan seguridad na peligro, incluso nan bida.
Arubus conhuntamente ta analizando e situacion y e ruta paden, pa wak con por logra esaki. E Director di Arubus a menciona cu e minister tambe kier mira e plan aki realiza.
Pa loke ta trata e caminda nobo cu ta bay keda cla na October, el a comenta cu ta bin cambionan nobo, pa wak con ta acapara e pasaheronan cu ta bay area di hotel, pa hiba nan mas lihe posible.
El a reitera cu Arubus ta bezig ta studiando cual ta e miho plannan, con por yuda nan clientela pa yega nan destino mas sigur y mas lihe posible. Tocante e abrisnan e director di Arubus a comenta cu Arubus tin diferente plan. Aworaki nan ta bezig cu un plan pa structura e parti aki di bushalte. Tin abris cu ta grandi y no por wordo ubica facilmente, y el a pidi Corsow potretnan di esnan cu nan tin y tin uno cu ta cuadra cu e area di Yiwana Morto.
Tin abris tipo moderno y tin abris cultural, y e compania ta studiando ki sorto nan ta bay pone. Director di Arubus ta conciente di e efecto cu e solo pisa tin riba e pasaheronan cu ta warda bus, y nan kier duna e clientele e comodidad for di momento cu nan yega e parada di bus banda di caminda, te ora nan subi bus cu airco (esnan nobo).
Arubus kier duna e usuarionan mas pa nan placa y abris tambe ta parti di e transporte publico. Nan ta trahando riba esey, sr. Mohamed a reitera, indicando cu nan tin hende interesa pa drecha y maneha e abrisnan, pero tur cos mester cay den e master plan di Arubus.
