Ing. Haime Croes, director:
ORANJESTAD (AAN)— Ing. Haime Croes, director di Departamento di Infrastructura y Planificacion (DIP), tambe tabata presente den conferencia di prensa, convoca pa Minister Otmar Oduber, Diaranzon mainta.
Señor Croes a señala cu loke ta pasando aworaki (encuanto otorgamento di tereno) e ta categoriza como un maneho hopi duidelijk, unda tur hende sa unda nan ta para y por wak esaki via e website di DIP.
Tur hende cu kier haya un tereno pa cas sa cual ta e procedure cu mester cana, pero tin hueyanan cu DIP ta keda haya pasobra si semper, durante e ultimo añanan, a keda haci cosnan cu no ta segun maneho, y no tin un manera transparente pa tur hende cumpli cune, lo por keda hendenan cu a haci cosnan cu no ta normal, cu lo keda bin.
Kiermen, lo no por stop e asuntonan aki, y esaki a wordo pronostica for di cuminzamento caba, cu DIP ta combatiendo un monster cu tin yen di sintoma. Importante ta cu den tur e asunto aki, e personanan no a haya tereno y tur cos ta canando awo, manera mester cana.
Sr. Haime Croes a subraya cu DIP a tuma cu honor tur loke ta investigacion, pasobra e basenan primordial di e maneho di Minister Otmar Oduber ta cu nan ta bay tene nan mes na un integridad halto.
A base di esey DIP a cuminza caba cu un investigacion pa loke ta trata e casonan cu ta saliendo na cla pero tambe pa loke ta trata integridad.
El a subraya cu e ta para tras di esaki y tur e hendenan cu tin na DIP aworaki, ta trahando hopi duro pa set up un departamento cu pa añanan a wordo laga afo, y pesey cu mucho gusto e lo bay Ministerio Publico pa entrega un keho a base di e informacion cu tin hende pafo di DIP cu ta pretende di haci algo cu no ta tumando lugar.
E ta bay pidi OM pa cumpli, pasobra no ta husto cu tin hende ta bay daña otro hende, bisando cu nan tin circulo den DIP, locual no ta e caso. Esaki ta e dos onderzoek cu DIP ta haciendo riba peticion di e minister y nan ta cumpliendo cune.
Director di DIP a señala cu nan ta hayando hopi Acta cu ta causa un barera. Tur e motibonan ta sali dilanti pasobra e hendenan no por haya e tereno y tin añanan ta wardando. DIP ta wak e parti di erfpacht cuminzando cu 92 y awor nan sa cu 2008 y 2009 ta bin awo, dia 26 di Augustus. Nan ta contento wardando e dia y e siguiente grupo ta na November cu lo yega na 2010.
