*nan ta pidi un edificio unda nan por traha
ORANJESTAD(AAN): Recientemente e trahadornan di e seccion di Cuido di Salud Hubenil di Departamento di Salubridad Publico (DVG) a tene un walkout y den un entrevista Sharon Evertsz di DVG a splica cue walkout ta pa demostra nan malcontento pa loke ta e situacion di e departamento.
“Ta asina cu for di aña pasa April nos edificio a wordo afgekeurd door di un docter di compania, pasobra e ta den un estado deplorable, unda cu e ta forma un peliger pa e personal y e clientenan”.
“Desde e dia ey nos no tin nos propio edificio, pues nos ta na diferente localidad, mientras cu nos no tin nos materialnan cu nos”.
Esaki segun Evertsz, kende a splica cu tur e material di e empleadonan a keda den e edificio bieu y unda cu nan ta traha aworaki no tin espacio pa trece e material.
“Esaki ta nifica cu nos trabao no por bay manera cu e tin cu bay, pues nos mes a purba bin cu algun solucion, mientras cu nos hefe di departamento a manda un carta pa e Minister concerni y dia 5 di Juli nos a sinta na mes cu Minister y nos a hasi algun palabracion”.
Esaki segun Evertsz, kende a indica cu e empleadonan di DVG a ripara cu e Minister no a cumpli cu e palabracionnan.
Pesey nan a dicidi cu no a keda otro opcion mas cu pone nan trabao abao.
Den esaki nan a duna e Minister 48 ora pa e reacciona cu un contesta satisfactorio.
“Pa nos esey ta nifica un edificio unda cu nos por traha mas pronto posibel, unda cu 20 persona por wordo ubica”.
