Home Gobierno Gobierno a haci inversion necesario pa digitaliza, moderniza y agiliza DTZ

Gobierno a haci inversion necesario pa digitaliza, moderniza y agiliza DTZ

13
0
SHARE
- Advertisement -

Minister Chris Romero:

ORANJESTAD (AAN) – Minister di Transporte, Comunicacion y Sector Primario sr. Chris Romero, tabata presente den conferencia di prensa di gobierno, Diahuebs mainta, y el a elabora tocante e infrastructura nobo di ICT, na Directie Communicatie Zaken (DTZ) y tambe a referi na e yegada di e flota nobo pa Arubus.

Tocante e tema di ICT na DTZ, e mandatario a bisa cu den e departamento aki tin aparatonan cu for di aña 2000 no a wordo renova y no a haya un inversion pa optimaliza den tempo moderno aki, cu nos ta bibando.

E mandatario a expresa cu hasta ta un berguenza pa bisa cu DTZ tabata trahando cu computernan cu tin cierto programanan cu no por a habri.

Mesora cu gobierno a tuma e mando, nan a bisa cu nan ta bay cambia e infrastructura pa DTZ cu ta un departamento cu sin duda, ta contribui na nos pais enormemente, door di diferente ley di telecomunicacion cu pais Aruba ta otorga.

E mandatario a señala cu gobierno a inverti den computer y no tabata tin internet ni wifi den e edificio, cu ta algo cu hende ta haya hasta den restaurant.
Minister Romero a comenta cu aworaki DTZ ta duna un hopi mihor servicio, y tur cos ta bay hopi mas lihe, y e trahadornan por intercambia documentonan cu otro mas lihe.

E Departamentonan di Finanzas y di duna permiso, ta trahando hopi mas optimal y mas awo cu gobierno ta bay den E-Government. Ora un departamento ta traha mas eficiente, ta spaar placa tambe, segun e dignatario. “Time is money” manera nan ta bisa, el a expresa.

Minister Romero a sigui splica cu den e departamento tecnico, antes e Inspector tabata bay na diferente lugar haci nan debido controlnan, y tur dato nan tabata tuma riba papel. Kiermen e trabao tabata manual.

Despues nan tabata bay DTZ pa traha un rapport, ora nan tabata caba nan tabata imprimi esaki, y e ora ey nan tabata hibe na e cliente y di eynan bin bek trabao.

E tabata tuma hopi mas tempo cu awendia cu e inspectornan no ta den e proceso menciona mas, pero nan ta completamente digitaliza.  Awo nan ta hinca tur informacion di biaha den e aparato y ta print e di biaha, y asina ta cana bay.

Enberdad e ta costa un suma pero e ta pa facilita e servicio y baha gastonan. Tur esaki ta inversionnan cu gobierno a haci pa optimaliza DTZ.

Gobierno, via DTZ, ta otorga permiso di ley di telecomunicacion radio y television y asina tin control tambe riba dje. Pa añanan largo DTZ no tabata tin un logger. Esaki ta un aparato pa haci debido control, y ora algo sosode por tuma diferente accion. Un logger no solamente ta proteha e doño di radioemisora y e radioyente pero tambe esnan cu ta presentador na radio.

Prome, e logger tabata asina anticua cu e no tabata den funcion mas, y gobierno mester a paga otro companianan pa haci e controlnan rekeri. Asina a yega na sumanan halto, siendo cu door di inverti pa moderniza e gastonan ta baha.

E mandatario a subraya cu esaki ta un inversion adecua cu mester a tuma lugar.

Minister Romero a comenta cu e trahadornan di DTZ tabata traha cu hopi miedo pa algo no crash, y awendia si prensa mes haya oportunidad di bay na e departamento y puntra con nan ta funciona awendia, e ta sigur cu nan ta bay bisa cu nan ta hopi contento cu e cambionan cu a tuma lugar y cu sigur awe nan por brinda un miho servicio den un tempo hopi mas corto y haci un miho trabao den e area di telecomunicacion.

Awendia DTZ tin e logger, cual ta haci e controlnan debido y ta graba e diferente radioemisoranan y si tin algo por wak’e, por warde pa tempo largo, of corte save den otro server.

- Advertisement -

DUNA COMENTARIO

Please enter your comment!
Please enter your name here