Home General Homber cu malesa HIV den Corte pa menaza hende cu morto

Homber cu malesa HIV den Corte pa menaza hende cu morto

266
0
SHARE
- Advertisement -

ORANJESTAD (AAN)  – Diahuebs mainta tabatin un caso penal no normal. Esaki pasobra durante tratamento di e caso, e sospechoso a bisa Hues cu e tin e virus HIV pa mas o menos 27 aña caba.

Ta normal cu ora un persona bisa cu e ta tin e virus HIV, tur hende ta bira masha cauteloso, aunke cu aki ta trata di un persona cu tin e virus pero no cu e virus a afect’e. Hendenan asina mester ta hopi cauteloso pasobra nan por pega otro cu e virus aki.

ACUSACIONNAN

E homber Venezolano biba na Aruba, R.R.V.(66), a scucha Fiscal lesa e acusacionnan contra dje. Fiscal a bisa cu tin tres acusacion.

E promer acusacion ta cu dia 1 Mei 2019, R.R.V. a menaza dos homber. T. y V. cu morto. E lo a expresa: “ Te mato”, “Sueltame. Dejame ir. Te voy a matar”, “Te encontraste tu muerte. Tarde o temprano te voy a matar. Vas a ver”.

E di dos acusacion ta cu el a kibra riba 1 di Mei 2019 un vas di mata door di tira esaki riba un hende.

E di tres acusacion ta cu el a trapa e homber V. cu forza riba su pia, cu consecuencia cu un dede di pia di V. a kibra.

MENAZA

Hues a lesa e procesverbaal di Polis caminda ta mustra cu R.R.V. a bay na cas di bisiña T. y cos a bay for di man. E famia di T. no kier pa R.R.V. bay e cas. A cuminsa pelea y el a dal V. skop y kibra un dede di pia. A tira baki di mata riba T. y a menaza nan cu morto. Hues a mustra cu V. a bisa cu despues el a bay hospital y a resulta cu un dede di pia a kibra y e mester a pone pia den gips. R.R.V. ta desmenti categoricamente di a maltrata y bringa cu nan. El a bisa Hues cu e tin HIV y no ta bringa. El a bisa Hues cu el a bisa e agentenan di Polis pa bisti handschoen pasobra e tabata sangra na su man ora nan a bay pa detene. Esaki ta un medida pa evita cu nan por pega cu e virus di HIV. Hues a bisa cu segun Polis, ta R.R.V. a bringa. R.R.V. ta desmenti cu el a bringa.

PROBLEMA DI FAMIA

Segun R.R.V. tabatin problema pa basta tempo relaciona cu e cas. Hues a bisa cu e bisiña a bisa cu tin miedo di R.R.V. y no kier laga yiunan hunga pafor ora R.R.V. ta cana ey banda. Segun R.R.V., el a haya prohibicion di Hues Comisario pa bay banda di e cas pa evita mas problema. Hues a puntra si tin problema ainda. R.R.V. a bisa cu no tin problema mas y ta evita di tin contacto.

A base di pregunta di abogado mr. Yarzagaray por a compronde cu e dama T. ta ruman di señora di R.R.V. Nan ta biba den e cas y R.R.V. ta biba den e apartamento patras. A surgi problema pasobra R.R.V. y su señora kier cobra huur pa e cas siendo cu e dama T. ta haya cu no mester paga pasobra e tin derecho riba e cas. Hues ta haya cu lo ta mihor pa e rumannan sinta na mesa pa yega na palabracion.

Ta asina cu R.R.V. tin 27 aña cu e virus HIV. E ta bibando di pensioen y no ta sali.

EXIGENCIA DI FISCAL

Fiscal a bisa cu a keda legalmente proba e acusacionnan contra R.R.V.. Tur problema ta relaciona cu e cas pa paga huur. Fiscal a bisa cu e no ta haya cu esaki ta forma di actua. Pa cu e castigo, el a bisa cu R.R.V. a keda 9 dia sera na Polis. Fiscal a exigi castigo igual na loke R.R.V. sinta. El a exigi 50 ora di trabou trabao pa comunidad pero condicional cu tempo di prueba 2 aña. Fiscal a pone condicion cu pa 1 aña R.R.V. no tin contacto cu e bisiña.

ABOGADO

Mr. Yarzagaray a bisa Hues cu e no tin problema cu exigencia di Fiscal.

SENTENCIA

Hues a sera tratamento di e caso y a dicta sentencia di biaha. Hues a bisa cu e ta haya legalmente proba e acusacionnan contra R.R.V. Hues a bisa cu el a mira cu tin mas cos tras di tur e asunto aki. Ta un diferencia di opinion entre famia pa cu e cas. Hues a bisa cu el a ripara cu R.R.V. tambe a compronde esaki. Hues a confirma exigencia di Fiscal. El a condena R.R.V. na e 9 dianan cu e tabata sera y 150 ora di trabou pa comunidad pero condicional cu un tempo di prueba di 2 aña. Tambe cu pa 1 aña, R.R.V. no por tin contacto cu e bisiña.

 

- Advertisement -

DUNA COMENTARIO

Please enter your comment!
Please enter your name here